«Tiriklar uchun qabriston»: Falastinlik fotograf Isroil asirligidagi zo‘ravonliklarni aytib berdi

Ozod qilingan falastinlik Shodi Abu Sido HAMAS va Isroil o‘rtasidagi o‘t ochishni to‘xtatish kelishuvi doirasida ozod etilganidan so‘ng Isroil asirligidagi boshidan kechirganlari haqida gapirdi. Fotografning so‘zlariga ko‘ra, isroillik qo‘riqchilar unga xotini va ikki farzandi o‘ldirilganini aytishgan. «Men xafa bo‘ldim. Ozodlikka chiqib, ularning ovozini eshitganimda, ishonmadim», - deb eslaydi u. Abu Sido 2024 yilning 18 martida G‘azo shimolidagi ash-Shifa kasalxonasidan o‘g‘irlab ketilgan va yetti oydan ko‘proq Isroil asirligida bo‘lgan. U dushanba kuni AQSH vositachiligidagi kelishuv asosida ozod qilingan 1700 falastinlik garovga olinganlardan biri edi. Fotosuratchining rafiqasi Xana Bahlulning aytishicha, Addameer inson huquqlari tashkiloti advokati unga eri Isroil hukumatiga odamlarni hech qanday ayblovsiz yoki advokatdan foydalanish imkoniyatini bermasdan hibsga olish imkonini beruvchi «Noqonuniy jangchilar to‘g‘risida»gi qonunga muvofiq hibsda saqlanayotgani haqida xabar bergan. Addameerning so‘zlariga ko‘ra, yahudiy davlati ayni paytda ushbu qonun doirasida 2673 nafar falastinlikni o‘g‘irlab ketgan. Abu Sidoning aytishicha, u kaltaklangan, qo‘liga kishan solingan va ko‘zlari bog‘langan holda soatlab tiz cho‘kishga majbur qilingan. U Sde-Teyman va Ofer harbiy lagerlarida saqlangan va keyin Ketziot qamoqxonasiga o‘tkazilgan. Isroil qamoqxona xizmati barcha mahbuslar qiynoqlar haqidagi xabarlarni rad etib, «qonunga muvofiq» qamoqda saqlanayotganini aytdi. Ayni paytda, Isroil armiyasi yuzdan ortiq zo‘ravonlik va hibsda o‘lim holatlarini tekshirayotganini tasdiqladi, biroq faqat ikkita holatda ayblov e’lon qilindi. «Qamoqxona tiriklar uchun qabriston. G‘azoga qaytganimda, jonim tanamga qaytgandek bo‘ldi. Ammo vayronagarchilikni ko‘rganimdan keyin hayotimni qayerdan boshlashni bilmayman», - dedi Abu Sido.