Тожикистон ва Туркманистон бизнес ҳамкорлигини кенгайтириш масалаларини муҳокама қилишди

Душанбеда Тожикистон-Туркманистон Бизнес Кенгашининг иккинчи йиғилиши бўлиб ўтди. Тожикистон Савдо-саноат палатаси матбуот хизмати хабар беришича, икки мамлакат вакиллари савдо, инвестиция ҳамкорлиги ва тадбиркорлар ўртасидаги тўғридан-тўғри алоқаларни ривожлантириш масалаларини муҳокама қилишди.
 
Ушбу тадбир Имомали Раҳмон ва Сердар Бердимуҳамедов ўртасидаги келишувларни амалга ошириш доирасида бўлиб ўтди. Учрашувда Туркманистондан 35 дан ортиқ вакил, жумладан, давлат амалдорлари ва хусусий сектор вакиллари иштирок этди. Тожикистон томонидан эса Иқтисодий ривожланиш ва савдо, Қишлоқ хўжалиги ва саноат вазирликлари, шунингдек, Инвестициялар ва давлат мулкини бошқариш, Туризмни ривожлантириш давлат қўмиталари ва Божхона хизмати ходимлари қатнашди.
 
Учрашувда Тожикистон Савдо-саноат палатаси раиси Фарҳодшоҳ Раҳмонализода Тожикистон ва Туркманистон ўртасидаги муносабатлар янги босқичга кўтарилганини таъкидлади. Унинг таъкидлашича, икки томонлама алоқаларнинг ривожланиши йирик хорижий инвестицияларни жалб қилиш ва хусусий сектор фаолиятини кенгайтириш учун қулай шароитлар яратган.
 
Ўз навбатида, Туркманистон Савдо-саноат палатаси раиси Мерген Гурдов ҳамкорликни кенгайтиришга ва Тожикистон-Туркманистон Ишбилармонлар кенгаши имкониятларидан фойдаланишга тайёрлигини билдирди. Унинг сўзларига кўра, Туркманистондаги йирик саноат, кимё ва логистика корхоналари тожикистонлик тадбиркорлар билан тўғридан-тўғри алоқаларни мустаҳкамлаш ва Тожикистонда қўшма инвестиция лойиҳаларини амалга оширишдан манфаатдор.
 
Эслатиб ўтамиз, аввалроқ Тожикистон электр энергияси экспортини 7 фоизга қисқартиргани ҳақида хабар берган эдик.