Тошкент вилоятида иқтисодий бурилиш: 6,2 млрд доллар инвестиция ва саноатдаги янги лойиҳалар

Тошкент вилоятида иқтисодиётни диверсификация қилиш ва инвестициявий жозибадорликни ошириш бўйича янги босқич бошланмоқда. 8 апрел куни Президент Шавкат Мирзиёев иштирокида бўлиб ўтган йиғилишда вилоятнинг 2026-йилги иқтисодий мақсадлари тасдиқланди. Унга кўра, вилоят иқтисодиётини 9,1 фоизга, саноатни 8,8 фоизга ва хизмат кўрсатиш соҳасини 17,2 фоизга ўстириш режалаштирилган. Бу мақсадларга эришиш учун жами 6,2 млрд долларлик инвестиция жалб этиш ва экспорт ҳажмини 2,8 млрд долларга етказиш белгиланди. Давлат раҳбари Тошкент вилояти пойтахт даражасидаги бизнес муҳитига эга бўлиши шартлигини алоҳида таъкидлади.

Вилоят саноатини янги босқичга олиб чиқиш учун қатор йирик лойиҳалар ишга туширилмоқда. Жумладан, Ангрен шаҳрида керамик плиткалар ишлаб чиқариш, Янгийўлда «Тинчлик» кичик саноат зонаси ва Паркентда «Parkent Pharm» эркин иқтисодий зонаси фаолияти кенгайтирилади. Шунингдек, пойтахт экологиясига зарар етказаётган 87 та корхонани вилоятга кўчириш дастури доирасида аллақачон 15 дан ортиқ тўқимачилик фабрикаси ўз ишини бошлади. Саноат лойиҳаларининг самарадорлигини ошириш мақсадида туманлар салоҳиятини СИ ёрдамида таҳлил қилувчи янги марказ ташкил этилиши ҳам маъқулланди.

Қишлоқ хўжалиги ва туризм соҳалари ҳам иқтисодий драйверлар сифатида белгиланди. Оҳангаронда 45 млн долларлик паррандачилик мажмуаси ва эчкичилик кластери барпо этилади, кам даромадли ғалла майдонлари ўрнига сердаромад экинлар (пиёз, саримсоқ) экиш кенгайтирилади. Туризм йўналишида эса Паркент, Оҳангарон ва Ангренда тоғ-чанғи курортлари ва эко-туризм қишлоқлари қурилиб, хизматлар экспортини 600 млн долларга етказиш кўзда тутилган. Йирик инновацион лойиҳа сифатида Юқори Чирчиқда 5 млрд долларлик «Tashkent Medical Smart City» қурилиши режалаштирилмоқда.

Саноат ва инфратузилма ривожи

Вилоятда саноатни бошқариш тизими тубдан ўзгаради. Ҳокимнинг саноат бўйича ўринбосари зиммасига экспортни ошириш ва ярим тайёр маҳсулотларни тайёр кўринишга келтириш бўйича аниқ KPI белгиланди.

Шунингдек, инфратузилмани яхшилаш мақсадида 956 млрд сўм маблағ йўналтирилиб, юзлаб маҳаллаларда сув, электр ва йўл тармоқлари тўлиқ янгиланади. Бу сармоядорлар учун қўшимча қулайликлар яратади.

Рақамли иқтисодиёт ва бандлик

Нурафшон шаҳрида 35,4 млн долларлик Келажак технологиялари маркази ташкил этилиб, унга 100 дан ортиқ хорижий IT компаниялари жалб қилинади. Бу лойиҳа йилига 20 миллион долларлик IT-хизматлар экспортини таъминлаши кутилмоқда.

Шу билан бирга, жорий йилда 883 та маҳаллани ишсизликдан холи ҳудудга айлантириш орқали 84,7 минг кишини доимий иш билан таъминлаш ва 37 минг норасмий иш ўрнини қонунийлаштириш режалаштирилган.