Тошкент халқаро молия марказида криптовалюта ва исталган валютада битимлар ўтказиш мумкин бўлади

Тошкент халқаро молия марказида инглиз умумий ҳуқуқи жорий қилиниши, мустақил регулятор ташкил этилиши ва битимларни исталган валютада амалга ошириш имконияти яратилиши режалаштирилмоқда.

Бу ҳақда Президент администрацияси лойиҳалар координатори Нодиржон Жўраев «Silk Road Finance & Technology Forum»да маълум қилди, дея Vaqt.uz мухбири хабар бермоқда.

Унинг сўзларига кўра, Тошкент халқаро молия маркази учун алоҳида ҳуқуқий ва институционал муҳит яратилади. Марказ иштирокчилари миллий молия тизимидаги одатий тартибга солиш тизимидан мустақил равишда фаолият юритиши режалаштирилмоқда.

Марказ учун алоҳида ҳуқуқий тизим яратилади

Нодиржон Жўраевнинг айтишича, Тошкент халқаро молия марказида инглиз умумий ҳуқуқи қўлланилади ва унинг фаолиятини тартибга солувчи мустақил регулятор ташкил этилади.

«Марказий банк ёки Истиқболли лойиҳалар миллий агентлиги Тошкент халқаро молия маркази иштирокчилари ёки муассасалари билан ишламайди», — деди у.

Шу билан бирга, молия маркази иштирокчилари Ўзбекистоннинг ички бозорида ҳам хизмат кўрсатиши мумкин бўлади. Бунинг учун Марказий банк билан ҳамкорликда тегишли норматив-ҳуқуқий база ишлаб чиқилади.

Жўраевнинг таъкидлашича, бундай ҳолатда миллий қонунчилик, жумладан, солиқ қоидалари амал қилади.

Исталган валюта ва криптовалютада битимлар

Тошкент халқаро молия марказида битимларни исталган валютада амалга ошириш имконияти яратилиши ҳам режалаштирилмоқда.

Бу, Жўраевнинг сўзларига кўра, Хитой, Сингапур, Япония ва бошқа давлатлардан корреспондент банкларни жалб қилиш имконини беради. Улар ўз миллий валюталарида операциялар ўтказиши мумкин бўлади.

Молия марказининг ҳуқуқий базасида криптовалюталардан айирбошлаш воситаси сифатида фойдаланиш ҳам назарда тутилган.

Шунингдек, хорижий компаниялар ва молия муассасалари учун жозибадор солиқ режими таклиф этилади.

«Хорижий компаниялар ва молия муассасалари учун ноллик солиқ ставкаси назарда тутилган. Ягона чеклов пул ювишга қарши талаблар билан боғлиқ бўлади», — деди Нодиржон Жўраев.

«Мақсад — Марказий Осиёни халқаро бозорларга боғлаш»

Марказий банк раиси ўринбосари Аброр Мирзо Олимов Тошкент халқаро молия маркази аниқ иқтисодий вазифаларни ҳал қилиши кераклигини таъкидлади.

Унинг фикрича, Ўзбекистон иқтисодиёти тез ўсиб бораётган бир пайтда молиявий саводхонлик ошмоқда, молиялаштириш имкониятлари кенгаймоқда ва мамлакатнинг халқаро молия тизимига интеграцияси кучаймоқда.

«Мен учун Тошкент халқаро молия маркази маҳаллий корхоналар ва молия муассасаларини халқаро институтлар ҳамда бозорлар билан боғлаши, компанияларнинг молиявий инструментлардан фойдаланиш имкониятларини кенгайтириши керак. Вақт ўтиши билан бу Марказий Осиёни янада самарали халқаро молия бозорлари билан боғлаш имконини беради», — деди Олимов.

Унинг айтишича, молия маркази доирасида аниқ ва белгиланган тизим асосида мослашувчан валюта режими бўлиши керак.

Бунда иштирокчилар трансчегаравий операцияларни амалга ошириш ва ўз капиталини эркин ҳамда осон репатриация қилиш имкониятига эга бўлиши назарда тутилмоқда.

«Биз молиявий барқарорликка хавф туғдирмасдан мослашувчанликни таъминламоқчимиз. Очиқлик шаффофлик, бозор яхлитлигини ҳимоя қилиш ҳамда пул ювиш ва терроризмни молиялаштиришга қарши самарали чоралар билан бирга бўлиши керак», — деди Марказий банк раиси ўринбосари.

Унинг таъкидлашича, асосий вазифа ягона тизим доирасида молия марказининг очиқлиги ва мамлакат молиявий барқарорлиги ўртасида мувозанатни таъминлашдан иборат.