Трамп Канаданинг аксарият товарларига 50 фоизлик бож жорий қилди

Оқ уй маълумотларига кўра, АҚШ президенти Дональд Трамп Канадада ишлаб чиқарилган айрим товарларга, жумладан, шаробдан тортиб хоккей таёқчалари ва цементгача бўлган товарларга 50 фоизлик бож жорий қилди. Бу ҳақда Оқ уй хабар берди.

Қайд этилишича, бу қарор Канаданинг Америка маҳсулотларига нисбатан «камситувчи муносабати»га жавобан қабул қилинган.

«Шу тариқа, президент Трамп Канаданинг АҚШ товарларига нисбатан адолатсиз савдо сиёсати туфайли америкалик экспортчилар кўраётган зарарни қоплашга ҳамда АҚШнинг асосий экспорт маҳсулотлари — автомобиллар, алкоголли ичимликлар ва сут маҳсулотлари учун тенг рақобат шароитларини яратишга ҳаракат қилмоқда», — дейилган хабарда.

Янги тарифлар энергия маҳсулотлари, калийли ўғитлар, балиқ ва муҳим минералларга таъсир қилмайди, лекин илгари Қўшма Штатлар-Мексика-Канада келишуви (USMCA) бўйича тарифлардан ҳимояланган маҳсулотларга таъсир қилади.

«Financial Times» нашри Трампнинг янги қарори Шимолий Америкада яна бир савдо можаросини келтириб чиқариши мумкинлигини ёзмоқда.

13-июль куни Трамп Канада ҳукуматини ўрмонлардаги чиқиндиларни тозаламасликда айблади. Унинг фикрича, бу АҚШ ҳудудида ҳаво ифлосланишига сабаб бўлмоқда. Трамп бу «бепарволик» учун Канададан божларни ошириш орқали товон ундириш билан таҳдид қилди.

Январь ойи охирида эса Трамп Канадани Хитой билан савдо битими тузмаслик ҳақида огоҳлантирганди. У акс ҳолда Канададан АҚШга олиб кириладиган барча маҳсулотларга 100 фоизлик бож жорий этилишини айтди. Шунингдек, Канада бош вазири Марк Карнини киноя тариқасида «губернатор» деб атаганди.

Трамп президентликнинг иккинчи муддати бошидаёқ Канада маҳсулотларига бож жорий қилганди. Канада экспортининг қарийб 75 фоизи АҚШ ҳиссасига тўғри келади. 2025-йил 1-августдан Канада маҳсулотларига умумий бож 35 фоизга оширилди. Бунгача, 2025-йил мартидан бошлаб аксарият маҳсулотларга 25 фоизлик бож амал қилиб келаётганди.