Трамп Мирзиёевни ҳам Ғазо бўйича Тинчлик кенгашига таклиф қилди
Президент Шавкат Мирзиёев Ўзбекистоннинг Яқин Шарқда тинчликни таъминлашга қаратилган Тинчлик кенгаши ташаббусига қўшилишга тайёрлигини билдирди.
Ўзбекистон Республикаси Президенти Шавкат Мирзиёев номига Америка Қўшма Штатлари Президенти Доналд Трампдан Яқин Шарқда тинчликни мустаҳкамлаш ва мавжуд можароларни ҳал этишга қаратилган халқаро ташаббусга қўшилиш бўйича расмий таклиф келиб тушди. Ушбу мурожаатда минтақада узоқ муддатли барқарорликка эришиш масалаларига алоҳида эътибор қаратилган.
Мактубда таъкидланишича, ташаббус 2025 йил 29 сентябр куни эълон қилинган бўлиб, қисқа вақт ичида қатор жаҳон етакчилари томонидан қўллаб-қувватланган. У, шунингдек, 2025 йил 17 ноябрда қабул қилинган БМТ Хавфсизлик Кенгашининг 2803-сонли резолюцияси билан маъқулланган Ғазодаги можарони тугатиш бўйича комплекс режага асосланади.
Таклиф этилаётган ташаббус доирасида янги халқаро тузилма — Тинчлик кенгашини ташкил этиш режалаштирилган. Ушбу кенгаш Яқин Шарқда тинчлик, барқарорлик ва хавфсизликни таъминлаш учун масъулиятни ўз зиммасига олишга тайёр бўлган давлатларни бирлаштиришни мақсад қилади.
Америка томони Ўзбекистон Республикасига мазкур Тинчлик кенгашига таъсисчи давлат сифатида қўшилиш таклифини билдирган. Бу таклиф Тошкентнинг минтақавий ва глобал тинчлик жараёнларидаги ўрни ва халқаро нуфузини инобатга олган ҳолда илгари сурилгани қайд этилмоқда.
Давлатимиз раҳбари америкалик ҳамкасбига йўллаган жавоб мактубида Ўзбекистон Тинчлик кенгашига таъсисчи давлат сифатида қўшилишга тайёр эканини билдирди. Президент ўз мурожаатида ушбу ташаббусни Яқин Шарқдаги кўп йиллик низоларни бартараф этиш, кенг минтақада тинчлик ва барқарорликни таъминлаш сари қаратилган муҳим халқаро қадам сифатида баҳолашини алоҳида таъкидлади.
Трамп аввалроқ Қозоғистон президенти Қосим-Жўмарт Тўқаевни ҳам Ғазо бўйича Тинчлик кенгашига таклиф қилган ва ижобий жавоб олган.
Шунингдек, у Россия президенти Владимир Путинга ҳам расмий таклиф юборган. Таклифга жавобан: «Ҳа, президент Путин ҳам дипломатик каналлар орқали ушбу тинчлик кенгашига қўшилиш таклифини олди. Биз ҳозирда бу таклифнинг барча тафсилотларини ўрганмоқдамиз. Шунингдек, барча нозик жиҳатларга ойдинлик киритиш учун Америка томони билан боғланишга умид қиламиз», — деди Россия президенти матбуот котиби Дмитрий Песков.
Эслатиб ўтамиз, АҚШ маъмурияти Кенгашда доимий ўрин олишни истаган давлатлардан камида 1 миллиард доллар миқдорида молиявий иштирок талаб қилган.
