Tramp: «Putin bilan Alyaskadagi uchrashuv muvaffaqiyatsiz bo‘lishi mumkin»

AQSH prezidenti Donald Tramp Alyaskadagi sammit haqida bayonot berdi. Uning aytishicha, Rossiya prezidenti Vladimir Putin bilan uchrashuv 25 foiz ehtimol bilan muvaffaqiyatsiz yakunlanishi mumkin. «Agar mazkur uchrashuv muvaffaqiyatsiz yakunlansa, biz sanksiyalarga murojaat qilamiz», — dedi Tramp. Prezident Tramp Ukrainadagi urushni to‘xtatish eng qiyin masalalardan biri ekanini ta’kidladi. Uning fikricha, Putin uning hayotidagi eng murakkab va kuchli raqiblardan biri hisoblanadi. Tramp Alyaskadagi sammitdan so‘ng Putin bilan birgalikda matbuot anjumani o‘tkazishni rejalashtirayotganini ma’lum qildi. Shuningdek, Ukraina prezidenti Vladimir Zelenskiy bilan bog‘lanib, uch tomonlama sammit o‘tkazish tashabbusi bilan chiqish niyatida ekanini bildirdi. Unga ko‘ra, bunday uchrashuvni tashkil etish uchun uchta ehtimoliy joy ko‘rib chiqilmoqda. Shu bilan birga, Tramp uchrashuvda o‘t ochishni to‘xtatish bo‘yicha kelishuvga erishish imkoniyati past ekanini aytdi. Uning fikricha, asosiy bahs chegaralar va yer masalalari bo‘yicha bo‘ladi. Agar uchrashuv muvaffaqiyatsiz o‘tsa, u hech kimga qo‘ng‘iroq qilmasligini qo‘shimcha qildi. Shunga qaramay, AQSH prezidenti Putin Ukraina mojarosiga barham berishni xohlashini va kelishuvga imzo qo‘yishi mumkinligini bildirgan.