Трамп Си Жинпинг билан Россия нефти импортини қисқартиришни муҳокама қилмоқчи

АҚШ президенти Доналд Трамп келаси ҳафта Хитой Халқ Республикаси раиси Си Жинпинг билан Россиядан нефт импортини камайтириш масаласини муҳокама этишни режалаштираётганини маълум қилди. Бу ҳақда у Қатар пойтахти Доҳада самолётига ёнилғи қуйиш учун тўхтаган чоғда журналистлар билан суҳбатда айтган, деб хабар бермоқда ТАСС.

Трамп Си Жингпинг билан Корея Республикасида бўлиб ўтадиган APEC саммити доирасида учрашмоқчи. Бунгача у Осиё қитъаси бўйлаб турнесида Малайзияда бўлиб ўтадиган АСЕАН саммитида ҳам иштирок этади. 28 октябр куни Трамп Японияга ташриф буюриб, янги бош вазир Санаэ Такаити билан учрашади.

«Мен буни муҳокама қилишим мумкин. Хитой Россиядан нефт харидини сезиларли даражада қисқартирмоқда. Ҳиндистон эса ундан бутунлай воз кечади», — деди Трамп.

Унинг сўзларига кўра, бу масала глобал энергетик хавфсизлик ва Украинадаги урушни молиялаштириш манбаларини чеклаш нуқтайи назаридан муҳим аҳамият касб этади.

16 октябр куни Вашингтондаги Хитой элчихонаси вакили Лю Пэнйуй Пекин ҳар қандай босим ёки мажбурлаш шаклини қабул қилмаслигини маълум қилган эди. У Россия билан ҳамкорликда ҳурмат ва тенглик тамойилларига амал қилиш зарурлигини таъкидлаган. Бу баёнот Трамп Хитойдан Россия нефтидан воз кечишни талаб қилганидан кейин берилганди.

Манбаларнинг таъкидлашича, Трамп Хитойга нисбатан эҳтимолий иқтисодий чоралар, жумладан, самолёт эҳтиёт қисмлари етказиб беришни тўхтатиш билан таҳдид қилган. Оқ уйдаги манбалар бу босим орқали Трамп Хитойни Россиянинг асосий энергетик бозоридан узишни кўзлаётганини билдирган.