Tramp va Netanyahu uchrashdi, G‘azoda qurbonlar soni oshmoqda
08.07.2025 | 10:4032082
AQSH prezidenti Donald Tramp Oq uyda Isroil Bosh vaziri Binyamin Netanyahuni qabul qildi. Ular uchrashuvda G‘azo sektoridagi ziddiyat va u yerdagi falastinliklarni boshqa davlatlarga ko‘chirish g‘oyasini muhokama qildilar. Uchrashuv Isroil harbiylari tomonidan 60 nafar falastinlik o‘ldirilgan bir paytda bo‘lib o‘tdi.
Mazkur uchrashuv Qatarda Isroil va HAMAS vakillari o‘rtasida o‘t ochishni to‘xtatish bo‘yicha bilvosita muzokaralar davom etayotgan pallaga to‘g‘ri keldi. Ammo voqelikda G‘azoda zo‘ravonliklar davom etmoqda. Yaqinda Yamandagi husiychilar Qizil dengizdagi ikkinchi kemaga hujum uyushtirdi.
G‘azo Sog‘liqni saqlash vazirligi ma’lumotlariga ko‘ra, urush boshlangandan buyon kamida 57 ming 523 kishi halok bo‘lgan, 136 617 kishi esa yaralangan. Shuningdek, 2023 yil 7 oktyabrdagi HAMAS hujumlari chog‘ida Isroilda 1139 kishi halok bo‘lgan, 200 dan ziyod inson asirga olingan edi.
Shu bilan birga, G‘azodagi ochlik va sanitariya inqirozi aholining ahvolini yanada og‘irlashtirmoqda. Shifokorlar bolalar o‘rtasida meningit holatlari ko‘payganidan xavotir bildirdi.
