Трампнинг ўғиллари Қозоғистондаги «стратегик металл» бизнесига кирди
АҚШ президентининг ўғиллари Марказий Осиёдаги энг йирик ўзлаштирилмаган волфрам конларидан бирига сармоя киритди. Лойиҳа ортида миллиардлаб долларлик давлат қўллови бор.
© SI asosida yaratilganАҚШ президенти Доналд Трампнинг ўғиллари — Эрик ва кичик Доналд Трамп Қозоғистондаги волфрам лойиҳасига улушдор бўлди. Ушбу лойиҳа уларнинг отаси маъмурияти томонидан 1,6 миллиард доллар давлат кўмаги олган, деб хабар беради «Financial Times».
FT маълумотларига кўра, ўтган йил август ойида ака-ука Трамплар «Skyline Builders Group» қурилиш компаниясидаги улушни «Dominari Securities» билан боғлиқ махсус воситачи компания орқали сотиб олган.
Йирик волфрам лойиҳасини «Cove Kaz Capital»га бериш
2025-йил 22-сентябр куни Қозоғистон президенти Қосим-Жўмарт Тўқаев Доналд Трамп билан учрашувда йирик волфрам лойиҳасини америкалик сармоя гуруҳи «Cove Kaz Capital»га бериш нияти борлигини билдирган. Ушбу компания кон учун хитойлик ва россиялик даъвогарлар билан рақобатлашган. 21-октябр куни матбуотда Тўкаев ва Трамп ўртасидаги келишув тафсилотлари эълон қилинганидан сўнг, 28-октябрда президент ўғиллари «Skyline»даги улушларини ошириб, хусусий жойлаштириш орқали қарийб 24 миллион доллар сармоя киритган.
31-октябр куни эса «Skyline» Осиёдаги «муҳим минераллар соҳасида катта активларга эга» компаниянинг 20 фоизи учун 20 миллион доллар тўлашга келишган. Бу компания «Kaz Resources» бўлиб, у «Cove Capital» таркибига киради.
6-ноябр куни, Оқ уйда ўтган саммит давомида «Cove Capital» ва Қозоғистон Миллий тоғ-кон компанияси дунёдаги «энг йирик ўзлаштирилмаган волфрам кони»ни ишлаб чиқиш бўйича келишувни эълон қилди. Гап Марказий Қозоғистонда жойлашган «Шимолий Катпар» ва «Юқори Кайракти» лойиҳалари ҳақида бормоқда. Лойиҳада 70 фоиз улуш «Cove Kaz Capital»га берилган.
Қазиб олиш 3,5 йилдан сўнг бошланади
Музокараларга шахсан Доналд Трамп ва АҚШ савдо вазири Ҳовард Латник аралашган, мақсад активни Хитой назоратига ўтиб кетишининг олдини олиш бўлган. Кон қурилиши икки йилдан сўнг бошланиши, қазиб олиш эса уч ярим йилдан кейин йўлга қўйилиши режалаштирилган.
30-апрел куни «Skyline Builders Group» «Cove Kaz Capital» ва «Kaz Resources» билан қўшилишини эълон қилди. Янги компания «Nasdaq» биржасида «KAZR» тикери остида савдо қилади. Пресс-релизда ака-ука Трамплар тилга олинмаган.
АҚШ Эксим банки ва АҚШ Халқаро молиявий ҳамкорлиги лойиҳа учун 1,6 миллиард долларгача маблағ ажратган. Волфрам мудофаа саноати учун стратегик металл ҳисобланади. АҚШда уни қазиб олиш 2015-йилдан буён амалга оширилмайди ва мамлакат асосан Хитой импортига боғлиқ.
Кичик Доналд Трампнинг вакили «Financial Times»га у «пассив инвестор» эканини, инвестиция киритган компаниялар номидан федерал ҳукумат билан мулоқот қилмаслигини айтган. Эрик Трамп эса нашр сўровларига жавоб бермаган. Оқ уй ҳам бу ҳолат юзасидан изоҳ бермаган.
