Trampning «yashirin» rejasi: Pentagon Eronga qarshi quruqlikdagi amaliyotga hozirlik ko‘rmoqda
AQSH Mudofaa vazirligi Eron hududiga quruqlikdagi qo‘shinlarni kiritish bo‘yicha batafsil rejalarni ishlab chiqqani aytilmoqda. Ayni paytda Yaqin Sharqqa minglab dengiz piyodalari va elita desantchi bo‘linmalari safarbar etilmoqda.
«CBS News»ning Pentagondagi yuqori lavozimli manbalariga tayanib xabar berishicha, harbiy qo‘mondonlik Eronda quruqlikdagi amaliyotlarni boshlash uchun aniq so‘rovlarni taqdim etgan. Garchi Prezident Donald Tramp 19-mart kuni Oval kabinetda jurnalistlarga «Men hech qayerga qo‘shin yuborayotganim yo‘q» deb bayonot bergan bo‘lsa-da, u «Agar yuborsam ham, buni sizga aytmagan bo‘lardim», deya qo‘shimcha qilgan.
Oq uy matbuot kotibi Kerolayn Livittning tushuntirishicha, Pentagonning vazifasi Oliy bosh qo‘mondonga tanlov imkoniyatini berishdir va bu hozircha yakuniy qaror qabul qilinganini anglatmaydi.
Harbiy rejalashtirish jarayonida nafaqat hujum, balki ehtimoliy quruqlikdagi to‘qnashuvlar paytida asirga olinadigan Eron askarlari va jangarilarini saqlash masalalari ham muhokama qilingan. Ma’lumotlarga ko‘ra, AQSH Yaqin Sharqqa mashhur 82-havo-desant diviziyasi bo‘linmalarini hamda Global tezkor harakat qilish kuchlarini yuborishga tayyorlanmoqda. Bu bo‘linmalar buyruq berilgandan so‘ng 18 soat ichida dunyoning istalgan nuqtasiga yetib borish va jangovar harakatlarni boshlash imkoniyatiga ega.
Dengiz piyodalari safarbarligi
Hafta boshida Kaliforniya qirg‘oqlaridan uchta harbiy kema va 2200 nafar dengiz piyodasidan iborat ekspeditsion bo‘linma yo‘lga chiqqan. Bu Eron bilan urush boshlanganidan beri mintaqaga yuborilayotgan ikkinchi yirik dengiz piyodalari guruhidir. Birinchi bo‘linma Tinch okeani mintaqasidan yuborilgan bo‘lib, hozirda manzil sari harakatlanmoqda. Ushbu kuchlarning asosiy vazifasi Ho‘rmuz bo‘g‘ozi qirg‘oqlarini nazorat qilish va Eronning sohil bo‘yidagi raketa tizimlarini yo‘q qilishdan iborat bo‘lishi mumkin.
Pentagon rejalariga ko‘ra, quruqlikdagi qo‘shinlar Ho‘rmuz bo‘g‘ozini to‘liq ochish va tijorat kemalari xavfsizligini ta’minlash uchun ishlatilishi mumkin. Shuningdek, ayrim ekspertlar AQSH dengiz piyodalari Eron ichkarisidagi yadroviy obyektlarni, xususan, Isfahondagi boyitilgan uran zaxiralarini qo‘lga olish bo‘yicha maxsus amaliyotlarda ishtirok etishi mumkinligini taxmin qilishmoqda. Bunday ssenariy urush ko‘lamining keskin kengayishiga va ikki tomondan ham ko‘plab qurbonlarga olib kelishi mumkin.
Trampning strategik ikkilanishi
Donald Tramp hozircha quruqlikdagi amaliyot bo‘yicha yakuniy to‘xtamga kelgani yo‘q. U aviazarbalar va raketa hujumlari orqali Eron harbiy infratuzilmasini yo‘q qilish strategiyasiga ko‘proq moyillik bildirmoqda. Biroq harbiy maslahatchilar Eronning bo‘g‘ozni qamal qilishda davom etayotgani va diversion hujumlarini to‘xtatmayotgani sababli, quruqlikdagi operatsiya yagona chora bo‘lib qolishi mumkinligini ta’kidlashmoqda.
Shu bilan birga, AQSHda yangi harbiy chaqiruv (draft) boshlanishi haqidagi xavotirlar ham kuchaygan. Kerolayn Livitt bu boradagi savollarga javob berar ekan, prezident barcha imkoniyatlarni «stol ustida» saqlab qolishini va kelajakdagi qadamlar operatsiya muvaffaqiyatiga bog‘liqligini aytdi. Tramp uchun Eron bilan urushda quruqlikdagi qo‘shinlarni ishga solish nafaqat harbiy, balki noyabrdagi saylovlar oldidan katta siyosiy tavakkalchilik hamdir.
