Uitkoff Putinning Ukraina bo‘yicha talablarini noto‘g‘ri tushungan bo‘lishi mumkin — Bild

6 avgust kuni Moskvaga tashrif buyurgan AQSH prezidentining maxsus vakili Stiven Uitkoff Vladimir Putin bilan uchrashuvda Rossiya rahbarining Ukrainaga qo‘ygan shartlarini noto‘g‘ri anglagan bo‘lishi mumkin. Bild nashri nemis va ukrain rasmiylariga tayanib, Putin Zaporijjya va Xersondan ukrain qo‘shinlarining «tinch yo‘l bilan chiqishini» talab qilgan, ammo Uitkoff buni Rossiya qo‘shinlarining chiqishi deb tushungani aytilmoqda. Manbalarga ko‘ra, aslida Putin Donetsk, Luhansk, Zaporijjya va Xerson oblastlarini to‘liq nazorat qilish niyatidan qaytmagan. Ukraina hukumatidan bir manba «Uitkoff nimani gapirayotganini o‘zi ham bilmaydi», degan. Shunday fikrni Germaniya hukumat vakillari ham qo‘llab-quvvatlagan. Bild ma’lumotiga ko‘ra, Putin faqat energetika ob’ektlari va front ortidagi yirik shaharlarga hujumni to‘xtatishni taklif qilgan, ammo to‘liq otashkesimga rozi emas. AQSH esa frontni joriy holatda muzlatish, sanksiyalarni kengaytirib olib tashlash va yangi iqtisodiy kelishuvlar evaziga bitim taklif qilgan, lekin Kreml bu variantni qabul qilmagan. Putin—Uitkoff muzokaralaridan so‘ng AQSH rasmiylari yevropaliklar bilan videomuloqot o‘tkazdi. Bildʼning yozishicha, yevropaliklarda amerikaliklarning vaziyatni to‘liq anglamayotgani haqida taassurot qolgan. Uitkoff hududiy masalalarni izohlar ekan, nutqi chalkash va malakasiz yiroq tuyulgan. Bundan oldin Bloomberg va The Wall Street Journal manbalari Kreml Donbassdan ukrain qo‘shinlarini olib chiqish va Qrim ustidan Rossiya nazoratini tan olish sharti bilan Xerson va Zaporijjyada hujumni to‘xtatishga tayyor ekanini yozgandi. Bunday «hududiy almashinuv» otashkesim va keyingi texnik muzokaralarga yo‘l ochishi mumkinligi qayd etilgan.