Украина денгизда уруш қоидаларини ўзгартирди — «The Atlantic»

Американинг «The Atlantic» нашрида эълон қилинган таҳлилга кўра, Украина денгизда уруш олиб бориш усулларини жиддий ўзгартирган, АҚШ эса ҳали ҳам ўтган аср стратегияларига суяниб қолмоқда. Муаллифлар бу фикрни Вашингтоннинг йирик ҳарбий кемаларга устувор аҳамият қаратаётгани билан изоҳлайди.

Нашрнинг эслатишича, АҚШ президенти Доналд Трамп яқинда янги линкорлар яратиш режаларини тилга олган. АҚШ ҳарбий-денгиз кучлари эса бу кемалар «тарихдаги энг ўлимвор юзаки жанг кемалари» бўлишини таъкидлаган. Бироқ «The Atlantic» бундай ёндашув тез ўзгараётган денгиз таҳдидларига мос келмаслигини қайд этади.

Нашр фикрича, АҚШ Украина тажрибасини жиддий ўрганиши лозим. Хусусан, сўнгги ойларда Украина Қора денгиз, Атлантика ва Ўрта ер денгизида нефт ташувчи танкерларга қарши ҳужумлар амалга оширди. Бу ҳужумлар асосан арзон, аммо самарали бўлган «Sea Baby» каби денгиз дронлари орқали уюштирилгани қайд этилган.

Таҳлилда айтилишича, ушбу кемалар эҳтимол Россиянинг «хуфиёна флоти» таркибига кирган ва уларга берилган зарбалар Кремлнинг нефт даромадларига жиддий путур етказмоқда. Бу ҳолат замонавий қарши кема технологиялари қанчалик арзон ва оммавийлашиб бораётганини кўрсатади.

Нашр, шунингдек, денгиз дронларини сув ости кемалари билан биргаликда қўллаш келажакда айниқса хавфли комбинацияга айланишини таъкидлайди. Бундан ташқари, ҳаво дронлари ҳам савдо ва ҳарбий кемалар учун жиддий таҳдид бўлиб қолмоқда.

Муаллифлар Украина томонидан қўлланган «Нептун» қанотли ракета орқали Россиянинг йирик ҳарбий кемалари йўқ қилинганини эслатиб, бундай қуроллар ҳатто авиаташувчи кемалар учун ҳам катта хавф туғдиришини таъкидлайди.

Якуний хулосада, «The Atlantic» эҳтимолий АҚШ–Хитой тўқнашуви денгизда мутлақо янги уруш қоидаларига асосланишини, акс ҳолда АҚШ узоқ давом этадиган минтақавий урушда устунликни йўқотиши мумкинлигини қайд этади.