Ukraina dronlari Rossiya neft eksportini rekord darajaga pasaytirdi
20.09.2025 | 12:0034913
Sentyabrda Rossiya neft mahsulotlari eksporti 2022 yildan buyongi eng past ko‘rsatkichga tushdi. Kiyevning dron hujumlari va ichki bozor talablari asosiy sabab deb ko‘rilmoqda.
Ukraina dronlari tomonidan amalga oshirilayotgan hujumlar va Rossiya energetika kompaniyalarining ichki bozorga yo‘nalishi oqibatida mamlakat neft mahsulotlari eksporti sezilarli darajada kamaydi. Bloomberg agentligining ma’lum qilishicha (https://www.bloomberg.com/news/articles/2025-09-19/russian-fuel-flows-slump-as-plants-hit-home-demand-prioritized), sentyabr oyining birinchi yarmida eksport hajmi kuniga 300 ming barrelga qisqargan.
Vortexa ma’lumotlariga ko‘ra, dizel va benzin eksporti o‘tgan oyga nisbatan 12 foizga kamayib, taxminan 699 ming barrelga tushgan. Aviakerosin eksporti esa 10 ming barrel bilan yillik antirekordni yangilagan.
Shu bilan birga, yagona o‘sish qayd etilgan mahsulot — mazut bo‘ldi. Uning eksporti kuniga 835 ming barrelgacha ko‘tarilib, 2023 yil aprelidan beri eng yuqori darajaga yetdi. Asosiy xaridorlar — Hindiston boshchiligidagi Osiyo davlatlari.
Vakuumli gazoyl kabi qayta ishlash uchun mo‘ljallangan xomashyo eksporti ham pasayib, kuniga 53 ming barrelgacha tushgan.
Bloomberg nashrining ta’kidlashicha, agar ushbu dinamika saqlansa, sentyabr oyi 2022 yildan buyongi eng past eksport darajasi bilan yakunlanadi. Bu esa Ukraina dron hujumlarining Rossiya neft sanoatiga jiddiy ta’sir ko‘rsatayotganini tasdiqlaydi.
Shuningdek, Rossiya hukumat rasmiylari oktyabrgacha avtomobil yonilg‘isi eksportini taqiqlashni uzaytirish va dizel yonilg‘isini ichki bozorga yo‘naltirish masalasini ko‘rib chiqmoqda.
