Uzbekistan Airways MDHdagi eng yaxshi 4-aviakompaniya sifatida e’tirof etildi
19.06.2025 | 13:0016242
World Airline Awards 2025 xalqaro reytingiga ko‘ra, Uzbekistan Airways Markaziy Osiyo va MDH davlatlari orasidagi eng yaxshi aviakompaniyalar ro‘yxatida 4-o‘rinni egalladi. Bu haqda rasmiy saytda e’lon qilingan ma’lumotlarga asoslanib xabar berildi.
Skytrax agentligi tomonidan tuzilgan mazkur reyting mintaqadagi yo‘lovchi aviaqatnov xizmatlarining sifatini baholash asosida shakllantiriladi. Unga ko‘ra, ro‘yxatdagi birinchi o‘rinni Qozog‘istonning Air Astana aviakompaniyasi egalladi. Undan keyingi o‘rinlarda Azerbaijan Airlines va FlyArystan joylashdi.
Uzbekistan Airways so‘nggi yillarda xizmat sifatini yaxshilash, havo parkini yangilash va xalqaro standartlarga mos xizmatlarni joriy etish bo‘yicha bir qator ishlar amalga oshirgan. Mazkur reytingda o‘rin egallash kompaniyaning mintaqaviy raqobatda mustahkam mavqega ega ekanligini ko‘rsatadi.
Skytrax har yili dunyoning turli mintaqalaridagi yo‘lovchilardan millionlab fikr-mulohazalarni jamlab, aviakompaniyalar sifatini baholaydi. Markaziy Osiyo va MDHdagi natijalar ham ana shu keng qamrovli so‘rovlar asosida tuzilgan.
Bu natija Uzbekistan Airways uchun xalqaro miqyosdagi yana bir muhim e’tirof sifatida baholanmoqda.
