Uzbekistan Airways'ning yarim yillik foydasi 45 foizga oshdi

Hisobot davrida kompaniyaning chipta va boshqa xizmatlardan tushgan tushumi 8,71 trln so‘mni tashkil etdi, bu o‘tgan yilga nisbatan 14,6 foiz ko‘p. Shunga qaramay, ularning ishlab chiqarish xarajatlari faqat 11,4 foizga o‘sib, 7,64 trln so‘mni tashkil qildi. Natijada umumiy foyda 1,07 trln so‘mdan oshdi. Operatsion xarajatlar ham sezilarli darajada ortgan — yarim yilda ular 504,99 mlrd so‘mga yetdi. Administrativ xarajatlar 60 foizga ko‘tarilib, 92,23 mlrd so‘mni tashkil qildi. Shu bilan birga, kompaniya 188,6 mlrd so‘mlik qo‘shimcha daromad qayd etib, asosiy faoliyatdan foydani 754,52 mlrd so‘mga yetkazdi. Moliyaviy faoliyatdan olingan daromadlar 479,1 mlrd so‘mni tashkil etdi. Valyuta kurslari farqidan kompaniya 424,85 mlrd so‘m foyda ko‘rdi. Biroq, valyuta o‘zgaruvchanligi ortidan kelgan zararlar ham 40 foizga o‘sib, 549,37 mlrd so‘mga yetgan. Shu bois, umumiy moliyaviy xarajatlar 771,6 mlrd so‘mni tashkil etdi. Kompaniya 72,1 mlrd so‘m miqdorida foyda solig‘ini to‘lagan. Aktivlar 16,3 foizga o‘sib, 20,86 trln so‘mga yetdi. Bu asosan yetkazib beruvchilarga to‘langan avanslarning ikki barobar oshishi hisobiga yuz berdi. Shu bilan birga, qarz majburiyatlari 2,28 trln so‘mga yetdi.