«UzTest»да йирик ўғирлик: Германиядан келган ускуна таг-туги билан йўқолди, миллиардлар исроф бўлди
08.07.2025 | 20:122 daqiqa
«ЎзТест» Бухоро филиалида Германиядан олиб келинган лаборатория ускуналаридан бири йўқолгани маълум бўлди. Шу билан бирга, миллиардлаб сўм маблағлар мақсадсиз сарфлаб юборилгани аниқланган.
Ўзбекистон техник жиҳатдан тартибга солиш агентлиги тасарруфидаги «ЎзТест» — «Ўзбекистон илмий синов ва сифат назорати маркази» давлат муассасасида катта миқёсда ўғирлик содир этилгани маълум қилинди.
Оммавий ахборот воситалари тарқатган хабарларга кўра, марказнинг Бухоро вилоятидаги ҳудудий филиалида 1 тонна 200 килограмм оғирликдаги ва тахминан 150 миллион сўмлик «Тормозной стенд» синов ускунаси ҳамда 250 миллион сўмлик газ баллонларини ўлчаш воситаси ўғирланган.
Шу билан бирга, муассасада 6 миллиард сўмга яқин маблағ мақсадсиз ишлатилгани ҳам фош этилган. Аммо бу ҳақда муассаса ёки агентлик раҳбарияти ҳозирча расмий муносабат билдирмаган.
