«UzTest»da yirik o‘g‘irlik: Germaniyadan kelgan uskuna tag-tugi bilan yo‘qoldi, milliardlar isrof bo‘ldi
08.07.2025 | 20:1210802
«O‘zTest» Buxoro filialida Germaniyadan olib kelingan laboratoriya uskunalaridan biri yo‘qolgani ma’lum bo‘ldi. Shu bilan birga, milliardlab so‘m mablag‘lar maqsadsiz sarflab yuborilgani aniqlangan.
O‘zbekiston texnik jihatdan tartibga solish agentligi tasarrufidagi «O‘zTest» — «O‘zbekiston ilmiy sinov va sifat nazorati markazi» davlat muassasasida katta miqyosda o‘g‘irlik sodir etilgani ma’lum qilindi.
Ommaviy axborot vositalari tarqatgan xabarlarga ko‘ra, markazning Buxoro viloyatidagi hududiy filialida 1 tonna 200 kilogramm og‘irlikdagi va taxminan 150 million so‘mlik «Tormoznoy stend» sinov uskunasi hamda 250 million so‘mlik gaz ballonlarini o‘lchash vositasi o‘g‘irlangan.
Shu bilan birga, muassasada 6 milliard so‘mga yaqin mablag‘ maqsadsiz ishlatilgani ham fosh etilgan. Ammo bu haqda muassasa yoki agentlik rahbariyati hozircha rasmiy munosabat bildirmagan.
