Visa Хитойнинг 144 трлн долларлик банк карталари бозорига киришга рухсат олди

Хитой Марказий банки Американинг Visa халқаро тўлов тизимига мамлакат бозорига кириш учун тайёргарликни бошлашга рухсат берди. Бу ҳақда «Bloomberg» хабар берди.

Рухсат Visa компаниясига Хитой ичида банк карталари орқали амалга ошириладиган тўловларни қайта ишлаш ва ҳисоб-китобларни амалга ошириш билан шуғулланувчи ташкилот тузишга тайёргарлик кўриш имконини беради. 2025-йилда Хитойда банк карталари орқали амалга оширилган операцияларнинг умумий қиймати 144 трлн долларни ташкил этган.

«Bloomberg»нинг таъкидлашича, Visa Хитойда фаолият юритиш учун лицензия олишга 2017-йилдаёқ ариза топширган. Бироқ компания мамлакат ичидаги банк карталари тўловларини қайта ишлаш тизимини яратишга фақат энди рухсат олди.

Visa бир йил ичида тайёргарлик ишларини якунлаши, шундан сўнг фаолиятини бошлаш учун ариза топшириши керак.

Компания бош директори Раян Макинерни олинган рухсатни изоҳлар экан, қуйидагиларни таъкидлади:

«Дунёнинг икки йирик иқтисодиёти ўртасида конструктив ва стратегик жиҳатдан барқарор муносабатларни йўлга қўйишда АҚШ ва Хитой етакчиларининг муҳим ролини юқори баҳолаймиз».

2025-йилнинг охирида Хитойда муомалада бўлган банк карталари сони 10,2 млрдга етган. Ўтган йили мамлакатда банк карталари орқали амалга оширилган операцияларнинг умумий қиймати 144 трлн долларни ташкил қилган.

Нашр маълумотига кўра, Visa’нинг рақобатчиси Mastercard Хитойда банк карталари бўйича ҳисоб-китобларни амалга оширишга ихтисослашган ўз бизнесини ташкил этиш учун 2020-йилдаёқ рухсат олган. Бир неча ой ўтиб, «American Express» компаниясига ҳам банк карталари орқали амалга ошириладиган тўловларга хизмат кўрсатишни бошлашга рухсат берилган.

Сентябр ойининг охирида Хитой раиси Си Цзинпин Вашингтонда АҚШ президенти Доналд Трамп билан учрашган. «The Wall Street Journal» нашрининг ёзишича, Хитой Марказий банки Visa’га рухсатни айнан икки давлат раҳбарлари ўртасидаги музокаралардан кейин берган. Бундан ташқари, Visa раҳбари Раян Макинерни Трампнинг май ойида Хитойга қилган ташрифи давомида ҳам унга ҳамроҳлик қилган.