«X» офисларида тинтув ўтказилди
Илoн Маскка тегишли «X» ижтимоий тармоғининг Франциядаги офисларида тинтув ўтказилди. Тинтув «X» платформасида алгоритм томонидан тавсия қилинаётган контент бўйича олиб борилаётган тергов доирасида ўтказилган.
Кибержиноятчиликка қарши курашишга ихтисослашган полиция бўлинмалари «Europol» кўмагида Илoн Маскка тегишли ижтимоий тармоқ – «X»нинг Франциядаги офисларида тинтув ўтказди.
Париж прокуратурасининг маълум қилишича, тинтув «X» платформасида алгоритм томонидан тавсия қилинаётган контент бўйича олиб борилаётган тергов доирасида ўтказилган. Кейинчалик ушбу тергов платформанинг баҳсли сунъий интеллект чат-боти – «Grok»ни ҳам қамраб олган.
Прокуратура, шунингдек, Илoн Маск ва «X»нинг собиқ бош ижроия директори Линда Яккарино апрель ойида бўлиб ўтадиган тингловларга чақирилганини маълум қилди.
«X» ҳозирча бу масалага изоҳ бергани йўқ. Аввалроқ «X» мазкур терговни сўз эркинлигига қарши ҳужум сифатида баҳолаган эди.
«X»га нисбатан тергов 2025 йил январ ойида бошланган, ўша йил июл ойида эса платформада шаҳвоний мазмундаги «deepfake» тасвирлар ва Холокостни инкор этувчи контент тарқалаётгани ҳақидаги хабарлардан сўнг кенгайтирилган. «X» ўша пайтда терговнинг кенгайишини «сиёсий мотивланган» деб атаган ва алгоритмни манипуляция қилгани ҳақидаги айбловларни рад этган.
Прокурорлар ҳозир «X» бир қатор соҳалар бўйича қонунни бузган-бузмаганини текшираётганини айтмоқда. Тергов доирасида қуйидаги эҳтимолий жиноятлар кўриб чиқилади: болалар иштирокидаги порнографик тасвирларни сақлаш ёки уюшган тарзда тарқатишга шериклик, шаҳвоний «deepfake»лар орқали шахсларнинг тасвирга бўлган ҳуқуқларини бузиш, шунингдек, уюшган гуруҳ томонидан маълумотларни фирибгарлик йўли билан олиш.
Прокуратура, шунингдек, «X» платформасини тарк этишини ва бундан буён «LinkedIn» ҳамда «Instagram» орқали мулоқот олиб боришини маълум қилди.
Сўнгги пайтларда Маскка тегишли платформа «Grok» сунъий интеллект воситаси орқали яратилган ва таҳрирланган шаҳвоний тасвирлар сабаб қаттиқ танқид остида қолди. Кўп ҳолларда бу тасвирлар аёлларнинг ҳақиқий суратлари асосида, уларнинг розилигисиз тайёрланган.
Бу ҳолат жабрланувчилар, онлайн хавфсизлик фаоллари ва сиёсатчилар томонидан кескин норозиликка сабаб бўлди. Оқибатда компания бундай амалиётни чеклаш учун аралашишга мажбур бўлди.
Январ ойи охирида Европа комиссияси ушбу тасвирлар билан боғлиқ хавотирлар сабаб «X»нинг она компанияси «xAI»га нисбатан ҳам тергов бошланганини эълон қилди. Бунга ўхшаш текширув аввалроқ Буюк Британия регулятори «Ofcom» томонидан ҳам бошланган эди.
Шунга ўхшаш айбловлар «Telegram» платформасига ҳам қўйилган. «Telegram» асосчиси Павел Дуров 2024 йил август ойида Париж аэропортида ҳибсга олинган эди. Дастлаб унга Франция ҳудудидан чиқиш тақиқланган, 2025 йил июн ойида эса чекловлар юмшатилиб, Дубайга бориб келишга рухсат берилганди. Ноябрда Франция ҳукумати Дуровга нисбатан амалдаги барча ҳаракатланиш чекловларини бекор қилди.
