Xitoy Britaniya harbiy kemasining Tayvan bo‘g‘ozidan o‘tishiga qarshi chiqdi

Britaniya harbiy-dengiz kuchlariga tegishli HMS Spey kemasining joriy haftada Tayvan bo‘g‘ozidan o‘tishi Xitoy tomonidan qattiq tanqid qilindi. Pekin bu harakatni «tinchlik va barqarorlikka tahdid soluvchi qasddan provokatsiya» deb atadi. Britaniya Qirollik dengiz kuchlari esa ushbu patrul oldindan rejalashtirilgan va xalqaro huquqka to‘la mos holda amalga oshirilganini ma’lum qildi. Tayvan Tashqi ishlar vazirligi bunday harakatlarni dengizda erkin harakatlanish huquqini ta’minlovchi muhim qadam sifatida olqishladi. HMS Spey — Hind-Tinch okeani mintaqasida doimiy navbatchilik qiladigan ikki britan kemasidan biri hisoblanadi. Bu patrul so‘nggi to‘rt yilda Britaniya harbiy kemasi tomonidan bo‘g‘ozdan amalga oshirilgan birinchi yurish bo‘ldi. Tayvanda mustaqillik tarafdori bo‘lgan Prezident Lay Chin-te hokimiyatga kelganidan so‘ng Xitoy va Tayvan o‘rtasidagi tanglik kuchaydi. U Pekinni «xorijiy dushman kuch» deb atab, Xitoy ta’sirini cheklovchi siyosat yuritmoqda. Britaniya Bosh vaziri Keir Starmer ushbu harbiy yurishni mamlakatning so‘nggi o‘n yillikdagi eng yirik tashabbuslaridan biri deb atadi. HMS Prince of Wales aviatashuvchisi yetakchiligidagi harbiy guruhda 4 mingga yaqin harbiy ishtirok etadi va ular 30 davlat bilan hamkorlik qiladi. Shu bilan birga, Xitoy Yaponiyaga yaqin suvlarda bir vaqtning o‘zida ikkita aviatashuvchi ishtirokida mashqlar o‘tkazmoqda. Bu esa Tokio tomonidan jiddiy xavotir bilan kuzatilmoqda.