Yaponiya Rossiyadan Xabarovskdagi «G‘alaba monumenti»ni olib tashlashni talab qildi

Yaponiya bosh vaziri Sanae Takaichi Rossiya tomonidan Xabarovskda o‘rnatilgan «G‘alaba monumenti»ni demontaj qilishni talab qildi. Uning so‘zlariga ko‘ra, yodgorlik kompozitsiyasi yapon xalqi uchun haqorat hisoblanadi.

Yaponiyaning e’tirozi

«Yaponiya hukumati Rossiya tomonidan yodgorlik o‘rnatilishini to‘xtatishni va uni demontaj qilishni qat’iy talab qildi. Biz bundan keyin ham Rossiya tomonini uni olib tashlashga qat’iy chaqirishda davom etamiz», — deya bayonot berdi Takaichi.

Gap 4-sentabr kuni Xabarovskda ochilgan bronza kompozitsiyasi haqida ketmoqda. Unda sovet askarining xrizantema gerbi tushirilgan chegara ustunini buzayotgani tasvirlangan.

Yaponiya bosh vazirining ta’kidlashicha, xrizantema gerbi keng miqyosda Yaponiya ramzi sifatida qabul qilinadi, shuning uchun uning yo‘q qilinishi tasvirlangan yodgorlikning o‘rnatilishi «mutlaqo qabul qilib bo‘lmas holat» hisoblanadi va yapon xalqining his-tuyg‘ulariga daxl qiladi.

Takaichi Tokio allaqachon Rossiyadan monument o‘rnatilishini to‘xtatishni va uni olib tashlashni rasman talab qilganini eslatib o‘tdi. Shuningdek, u Yaponiya hukumati yodgorlikni demontaj qilishga erishishda davom etishini qo‘shimcha qilgan.

Moskvaning javobi

O‘z navbatida, Rossiya Tashqi ishlar vazirligining rasmiy vakili Mariya Zaxarova Yaponiyaning Xabarovskdagi yodgorlikni olib tashlash talabiga munosabat bildirdi.

«Endi faqat shamoldan esmaslikni va quyoshdan nur sochmaslikni talab qilish qoldi... Yerimiz — ajdodlarimiz tomonidan himoya qilingan; tariximiz — faktlarga asoslangan; xotiramiz — yodgorlikda muhrlangan», — dedi u.

Shu bilan birga, Zaxarova «Tokio o‘z tarixiga hurmatsizlik bilan qarashini» aytdi.