Yaponiyaning O‘zbekistondagi yangi elchisi Kenji Hirata faoliyatini boshladi
O‘zbekiston tashqi ishlar vaziri Baxtiyor Saidov Yaponiyaning mamlakatimizdagi yangi elchisi Kenji Hiratani qabul qildi. Tomonlar ikki davlat o‘rtasidagi hamkorlikni yanada kengaytirish, investitsiya va innovatsiya sohalaridagi qo‘shma loyihalarni rivojlantirish masalalarini muhokama qildi.
Uchrashuv chog‘ida elchi ishonch yorliqlarining nusxalarini vazirga topshirdi. Baxtiyor Saidov uchrashuv haqidagi ma’lumotni o‘zining Telegram-kanali orqali e’lon qildi. Unda ta’kidlanishicha, Yaponiya va O‘zbekiston o‘rtasidagi ikki va ko‘p tomonlama munosabatlar izchil ravishda rivojlanib bormoqda.
«O‘zaro manfaatli tashabbuslar va loyihalar doirasida hamkorlik kengaymoqda. Elchi janoblariga mamlakatimizdagi diplomatik faoliyatida katta muvaffaqiyatlar tilaymiz», — deb yozdi Saidov.
Kenji Hirata Yaponiyaning tajribali diplomatlaridan biri bo‘lib, u ilgari tashqi siyosat va xalqaro hamkorlik sohalarida faoliyat yuritgan. Yangi elchi sifatida u ikki davlat o‘rtasidagi munosabatlarni iqtisodiy va madaniy yo‘nalishlarda yanada mustahkamlashga intilishi kutilmoqda.
O‘zbekiston va Yaponiya o‘rtasida savdo, sanoat, transport, ta’lim hamda texnologiyalar sohalarida qator qo‘shma loyihalar amalga oshirilmoqda. Yangi elchi tayinlanishi ikki tomonlama munosabatlar yangi bosqichga chiqishiga xizmat qilishi mumkin.
