Европа ЖЧ–2026ни бойкот қилишни муҳокама қилмоқда
Гренландия атрофидаги сиёсий зиддиятлар АҚШда ўтадиган жаҳон чемпионати тақдирига ҳам соя солди.
Европа Иттифоқи давлатлари 2026 йилнинг 11 июнидан 19 июлигача АҚШ, Мексика ва Канадада ўтказилиши режалаштирилган футбол бўйича жаҳон чемпионатини бойкот қилиш ғояси муҳокама қилинмоқда. Турнир. Бу ҳақда «The Economist» нашрида хабар қилмоқда.
Нашр журналисти Шашанк Йошининг ёзишича, Брюсселдаги муҳит «қатъий, ҳатто қўзғалон туси»ни олган. Унинг таъкидлашича, айрим доираларда ЧМ–2026ни бойкот қилиш 1980 йилда АҚШ томонидан Москва Олимпиадаси бойкот қилинган ҳолатни эслатмоқда.
Ҳаммасига сабабчи — Трамп
Бойкот эҳтимолини Германияда ҳам очиқ муҳокама қилишмоқда. Бундестагдаги ХДИ/ХСИ блокининг ташқи сиёсат бўйича спикери Юрген Ҳардт бу вариантни истисно қилмади. Унинг сўзларига кўра, бундай қадам фақат «энг сўнгги чора» сифатида кўриб чиқилади ва АҚШ президентини Гренландия масаласидаги позициясини қайта кўриб чиқишга мажбур этишга қаратилган.
Ҳардт «Bild» нашрига берган интервюсида турнирни бекор қилиш ёки унда иштирок этмаслик сиёсий босим воситаси эканини таъкидлади. Бу баёнотлар Европа мамлакатларидаги умумий кайфиятни янада очиқ кўрсатиб берди.
Мухлислар ҳам норози
Инқироз АҚШ президенти Доналд Трампнинг Гренландия устидан назорат ўрнатиш ҳақидаги баёнотлари ортидан кескинлашди. Орол расман Даниянинг автоном ҳудуди ҳисобланади. Трамп эса Гренландияни Россия ва Хитой флотлари «қуршаб олгани»ни иддао қилиб, уни АҚШ мудофааси учун «муҳим ҳудуд» деб атаган.
Бу пайтда жамоатчилик реакцияси ҳам кучаймоқда. Яқинда Roya News хабар беришича, АҚШ сиёсатига норозилик сифатида қарийб 17 минг нафар мухлис жаҳон чемпионати чипталарини қайтариб топширган. Агар сиёсий кескинлик пасаймаса, ЖЧ–2026 илк бор спорт эмас, геосиёсат марказига айланиши мумкин.
