Yevropaliklar Rossiyani kechirishga tayyor

Ukrainaning ittifoqchilari to‘liq o‘t ochishni to‘xtatish rejimiga erishilgan taqdirda, Rossiyaga qarshi sanksiyalarni bosqichma-bosqich yumshatish imkoniyatini ko‘rib chiqmoqda. Bu haqda Yevropa Ittifoqi Kengashi rahbariyatiga yaqin manbalar Sky News’ga ma’lum qildi. Taklif etilayotgan rejaga ko‘ra, kelishuvlar buzilgan har qanday holatda cheklovlar darhol qayta tiklanishi ko‘zda tutilgan. Telekanal suhbatdoshlari dastlab 15 kunlik tinchlik kelishuviga erishish mumkinligiga umid bildirmoqda - bu bosqichda sanksiyalar rejimi o‘zgarishsiz qoladi. Agar harbiy harakatlar to‘xtatilsa, tomonlar Ukraina hududida uzoqroq va tizimli o‘t ochishni to‘xtatish rejimiga o‘tishlari mumkin, deb hisoblaydi Yevropa Kengashi. Italiya hukumatidagi alohida manbalarning Sky News’ga ma’lum qilishicha, 13 avgust kuni Yevropa yetakchilarining AQSH prezidenti Donald Tramp bilan videokonferensiyasi chog‘ida Rim Trampning Rossiya prezidenti Vladimir Putin bilan rejalashtirilgan muzokaralari doirasida Yevropa davlatlarining Ukrainadagi kelishuvni muhokama qilishda to‘liq ishtirok etishini talab qilmoqchi. «Tramp Yevropa mamlakatlarini harbiy xarajatlarni oshirishga bir necha bor da’vat etgani sababli, biz ham bu jarayonning bir qismi bo‘lishimiz kerak», - deya tushuntirdi italiyalik diplomat. Manbalarga ko‘ra, Italiya muzokaralar chog‘ida Ukraina xavfsizligiga oid aniq harbiy, iqtisodiy va siyosiy kafolatlar zarurligini alohida ta’kidlamoqda.