1 июлдан «квартплата» қарздорлиги учун электр чеклови ўрнатилади

Президентнинг 5 февралда қабул қилинган «Кўп квартирали уйларни бошқариш тизимини янада такомиллаштириш бўйича қўшимча чора-тадбирлар тўғрисида»ги қарорига мувофиқ, 1 июлдан бошлаб кўп квартирали уйларда мажбурий тўловлар бўйича янги тартиб жорий этилади. Унга кўра, уй мулкдори квартплата тўловини ойнинг 15-санасига қадар амалга оширмаса, унинг электр энергияси учун тўловларини қабул қилиш қарздорлик тўлиқ қоплангунга қадар тўхтатилади.

Қарорда белгиланишича, кўп квартирали уйнинг банк ҳисобварағида жамланган маблағлар ҳар ой биринчи навбатда умумий уй эҳтиёжлари учун сарфланади. Булар қаторига подезд, зинапоя ва йўлакларни ёритиш, лифт ишлаши, уй атрофини ёритиш, насослар ва бошқа умумий инфратузилма харажатлари киради.

Янги механизмга кўра, мажбурий тўловлар кечиктирилган ҳар бир кун учун пеня ҳисобланади. Юридик шахслар учун кечиктирилган сумманинг 0,4 фоизи, жисмоний шахслар учун эса 0,1 фоизи миқдорида жарима белгиланган. Бироқ пеня миқдори ҳар бир ой учун қарз суммасининг 50 фоизидан ошмаслиги шарт.

Ҳисобланган пеня маблағлари тенг улушларда кўп квартирали уйнинг банк ҳисобварағига ҳамда «Менинг уйим» ахборот тизимини сақлаш харажатларини қоплашга йўналтирилади. Бу орқали уйларни бошқариш тизимида молиявий интизомни кучайтириш мақсад қилинган.

Қарорга кўра, мажбурий тўловлар фақат банк карталари, электрон тўлов тизимлари ёки банк кассалари орқали амалга оширилади. Нақд пул орқали тўлов қабул қилинмайди.

Мазкур тартиб кўп квартирали уйларни бошқариш самарадорлигини ошириш ва умумий коммунал хизматлар бўйича қарздорликни қисқартиришга қаратилган.

Шунингдек, ижтимоий тармоқларда кўп қаватли уйларга хизмат кўрсатувчи бошқарув органлари томонидан белгиланаётган тарифлар бўйича эътирозлар юзага келган эди. Қурилиш вазирлиги аҳоли ўз нархларини эркин белгилаши ва бошқарув компаниясини бемалол ўзгартиришлари мумкинлигини маълум қилди. Барча тўловлар «Менинг уйим» тизими орқали амалга оширилади, ҳар бир бино алоҳида ҳисоб рақамига эга. Бошқарув компаниялари ҳисобот беришлари шарт, акс ҳолда тўловлар тўхтатилади.

Мамлакат бўйича ўртача нарх квадрат метр учун 1221 сўмни, Тошкентда эса 1823 сўмни ташкил этади.

Эслатиб ўтамиз, аввалроқ Ўзбекистонда кўп квартирали уйлар атрофидаги барча дарахт ва буталар рақамли хатловга олиниб, ягона тизимда назорат қилиниши ҳақида хабар берган эдик.