2025 йилда дунёда энг кўп қайси бренд машиналари сотиб олингани маълум қилинди

Visual Capitalist нашри 2025 йилда дунёда энг кўп сотилган автомобил брендлари рўйхатини эълон қилди.

Унга кўра, Toyota жаҳонда энг кўп автомобиль сотган бренд сифатида биринчи ўринни эгаллаган. Компания 2025 йилнинг биринчи ярмида 4,7 миллиондан ортиқ автомобиль сотган.

Кейинги ўринларда:

 2. Volkswagen – 2,320,300;

 3. Ford – 2,075,500;

 4. BYD – 2,004,442;

 5. Hyundai – 1,956,774;

 6. Honda – 1,661,200;

 7. Сузуки – 1,631,000;

 8. Nissan – 1,624,851;

 9. Kia – 1,587,536;

 10. Chevrolet – 1,490,500;

 11. BMW – 1,070,814;

 12. Geely – 992,616;

 13. Mercedes – 899,974;

 14. Renault – 808,674;

 15. Audi – 783,531.

Тўртинчи ўриндаги BYD автомобиль бозори учун ҳақиқий «сюрприз»га айланди. Компания бир йилда 31 фоизлик ўсиш қайд этган бўлиб, 2 миллиондан ортиқ автомобил сотган. Мутахассислар йил якунига қадар BYD Фордъни ортда қолдириши мумкинлигини айтишмоқда. Бу натижа Хитойнинг тез ўсиб бораётган электромобил бозори ва бренднинг Европа ҳамда Лотин Америкасидаги фаол экспансияси билан боғлиқ.

Бошқа анъанавий брендлар учун йилнинг биринчи ярми турлича кечди. Honda, Nissan, Mercedes ва Аудиʻнинг сотувлари ўтган йилга исбатан 2–7 фоиз орасида пасайиш қайд этган. Европада талабнинг сусайиши ва иқтисодий ноаниқлик ушбу брендларнинг глобал кўрсаткичларига таъсир кўрсатган. Шу билан бирга, Hyundai, Kia ва Chevrolet каби брендлар барқарор ўсишга эришган. Уларнинг янги моделлари ва рақобатбардош нарх сиёсати глобал бозорлардаги мавқеини кучайтирган.

Ўн иккинчи ўриндаги Geely эса 59 фоизлик улкан ўсиш билан энг жадал ривожланувчи бренд сифатида қайд этилган. Умуман олганда, глобал трендлар электромобилларга талаб ортиб, Хитой ишлаб чиқарувчиларининг рақобатбардошлиги кучайиб бораётганини кўрсатмоқда.

Эслатиб ўтамиз, аввалроқ 10 ой давомида Ўзбекистонда энг кўп қайси автомобиль ишлаб чиқарилганлиги ҳақида маълумот берилган эди.