2030 йилгача 3 та банкда исломий молия хизматлари йўлга қўйилади
Ўзбекистон банк тизимида исломий молияни босқичма-босқич жорий этишни режалаштирмоқда.
Ўзбекистон 2030 йилга қадар учта тижорат банкида исломий молия хизматларини йўлга қўйишни режалаштирмоқда. Бу ташаббус жамоатчилик муҳокамаси учун тақдим этилган «Ўзбекистон-2030» янги стратегиясида акс этган бўлиб, молия бозорини диверсификация қилиш ва аҳоли ҳамда бизнес учун муқобил молиявий инструментларни кенгайтиришга қаратилган.
Стратегияда исломий молия тизими учун зарур бўлган ҳуқуқий асосларни яратиш устувор вазифалардан бири сифатида белгиланган. Қонунчилик базасининг шакллантирилиши банк тизимида шариат тамойилларига мувофиқ молиявий маҳсулот ва хизматларни жорий этиш имконини беради.
Ҳужжатга кўра, исломий молия хизматларини тақдим этувчи биринчи тижорат банки 2027 йилда фаолият бошлайди. Кейинги банк 2029 йилда ишга туширилиши, учинчи банк эса 2030 йилда бозорга кириб келиши режалаштирилган.
Исломий молия хизматлари жорий этилиши мамлакатда инвестиция муҳитини яхшилаши, шунингдек, халқаро исломий молия институтлари билан ҳамкорликни кенгайтириши кутилмоқда.
Аввалроқ Ўзбекистон бешта давлат банкини хусусийлаштиришни режалаштираётгани ҳақида хабар берган эдик.
