9 декабрдан метронинг уч йўналишидаги кассалар ёпилади
Тошкент метрополитени «Ерусти ҳалқа йўли», «Пахтакор» ва «Алишер Навоий» бекатларида нақд тўлов камайгани сабаб кассалар ёпилишини маълум қилди.
Тошкент метрополитени 9 декабрдан бошлаб «Ерусти ҳалқа йўли» йўналишидаги барча 14 та бекатда, шунингдек, марказий «Пахтакор» ва «Алишер Навоий» бекатларида кассаларни тўхтатишини маълум қилди. Қарорга асосий сабаб сифатида ушбу нуқталарда нақд пул орқали амалга оширилаётган тўловлар улушининг жуда паст экани кўрсатилган.
Метрополитен матбуот хизматининг қайд этишича, бекатлардаги кассалар ўрнига янги инфокиоскалар ўрнатилиб, улар орқали QR кодли чипталарни харид қилиш имкони яратилган. Мазкур аппаратлар йўловчилар оқимини тезроқ ўтказиш, жонли навбатларни қисқартириш ва тўлов жараёнини тезлаштиришга хизмат қилади.
Янги тизим орқали олинган чипталарни мобил телефонда сақлаш ёки қоғозга чоп этилган шаклда қўллаш мумкин. Метрополитен бу орқали тўлов инфратузилмасини рақамлаштириш ва эксплуатацион харажатларни қисқартиришни кўзламоқда.
Метродаги кассалар босқичма-босқич ёпиб борилмоқда: июль ойида 13 та бекатнинг биттадан вестибюлида касса фаолияти тугатилгани маълум қилинган эди. Шу билан бирга, йил охиригача касса оператори ва катта оператор лавозимлари тўлиқ бекор қилиниши айтилган.
