Афросиёб поездлари ҳаракат жадвали ўзгаради
14 декабрдан юқори тезликдаги Афросиёб электропоездлари йўловчилар учун қулайлаштирилган янги ҳаракат жадвали асосида қатнайди.
14 декабрдан бошлаб Ўзбекистонда юқори тезликда ҳаракатланувчи Афросиёб электропоездлари янги ҳаракат жадвалига ўтади. Бу ҳақда «Temiryo‘lekspress» матбуот хизмати расман маълум қилди.
Янги жадвал 2025–2026 йиллар мавсуми учун тасдиқланган бўлиб, йўловчи оқимини янада самарали ташкил этишга қаратилган.
Янгиланган ҳаракат жадвали Тошкентдан Бухоро, Қарши, Шаҳрисабз ҳамда Самарқанд йўналишларида қатновларни қамраб олади. Ушбу йўналишлар мамлакат ичида энг талаб юқори бўлган темирйўл маршрути ҳисобланади ва ҳар куни минглаб йўловчилар томонидан фойдаланилади.
Тошкент–Бухоро–Тошкент йўналишида кун давомида бир неча рейслар амалга оширилади. Эрталаб ва кечки соатларга мўлжалланган қатновлар орқали йўловчилар сафар режасини ўз эҳтиёжига мос равишда белгилаши мумкин. Шунингдек, тунги рейслар ҳам сақлаб қолинган.
Тошкент–Қарши ва Тошкент–Шаҳрисабз йўналишларида кундалик икки томонлама қатновлар ташкил этилган. Бу эса жанубий ҳудудлар билан пойтахт ўртасидаги транспорт алоқасини янада мустаҳкамлайди. Тошкент–Самарқанд йўналишида эса анъанавий равишда эрталабки ва кечки рейслар амал қилади.
Эслатиб ўтамиз, талабалар учун маҳаллий йўналишларда поезд чипталарига 50 фоизлик чегирма эълон қилинганди. Ушбу имтиёз 18 декабрдан 12 январга қадар амал қилади, бироқ SV/VIP тоифадаги вагонлар ҳамда Афросиёб электропоездлари бундан мустасно.
Шу билан бирга, илгари Hyundai Rotem компанияси томонидан Ўзбекистонга янги юқори тезликдаги поездлар етказиб берилиши маълум қилинган эди. «Жалолиддин Мангуберди» деб номланган поездларнинг илк партияси 2026 йил бошида мамлакатга олиб келиниши режалаштирилган.
