Александр Стубб: «Кремл Трамп билан учрашувни бекор қилиб, стратегик хатога йўл қўйди»
Финландия президенти Кремл Будапештдаги имкониятни қўлдан бой берганини таъкидлади. Унга кўра, Трамп билан учрашувнинг бекор қилиниши Россия учун йўқотиш бўлган.
Финландия президенти Александр Стуббнинг таъкидлашича, АҚШ президенти Доналд Трамп ва Россия президенти Владимир Путин ўртасида Будапештда бўлиши керак бўлган учрашувнинг бекор қилиниши Кремл учун стратегик хатога айланди. Бу ҳақда у Associated Press нашрига берган интервюсида маълум қилди.
Стуббнинг сўзларига кўра, учрашув бекор қилиниши АҚШ давлат котиби Марко Рубио ва Россия ташқи ишлар вазири Сергей Лавров ўртасидаги телефон суҳбатидан сўнг қабул қилинган. Рубио бу мулоқот давомида «Россия бир қадам ҳам чекинмагани»ни англаб етган ва Трампни бефойда музокараларга мажбур этмасликни маъқул кўрган.
«Учрашувни бекор қилиш Россия томонининг яна бир стратегик хатоси бўлди. Уларда имконият бор эди, лекин улар уни бой беришди», — деди Финландия раҳбари.
Стубб Трамп билан алоқалар ўрнатишда голф унинг учун энг қулай восита бўлганини қўшимча қилди. Унинг фикрича, Трамп ва Украина президенти Володимир Зеленский ўртасида муносабатлар кескин бўлса-да, Европа етакчилари улар ўртасида кўприк бўла олади.
«Биз президент Трампнинг фикрларини Зеленскийга, Зеленскийнинг позициясини эса Трампга етказамиз», — деди у.
Финландия президентининг сўзларига кўра, Путин билан очиқ ва тўғридан тўғри мулоқотни фақат битта инсон — Доналд Трамп олиб бориши мумкин. Шу билан бирга, у Европа Иттифоқи яқин фурсатда Путин билан мустақил алоқа ўрнатиш эҳтимоли жуда паст эканини қайд этди.
