Америкалик сиёсатчилар Стив Уиткоффни қаттиқ танқид қилди

Америкалик қатор сиёсатчилар Bloomberg эълон қилган стенограммалар ортидан Стив Уиткоффга қарши кескин баёнотлар берди. Конгресс аъзолари уни Россияга ёрдам берганликда айблаб, Украина бўйича музокараларда унга ишониш мумкин эмаслигини таъкидлашди.

Айрим қонун чиқарувчилар ҳатто уни «чинакам хоин» деб атади. Сиёсий можаро Вашингтонда кескинлашар экан, воқеага Доналд Трамп маъмуриятидан расмий муносабат ҳам талаб қилинмоқда.

Bloomberg маълумотига кўра, АҚШ президентининг махсус вакили Стив Уиткофф 14 октябр куни Владимир Путин ёрдамчиси Юрий Ушаков билан беш дақиқадан кўпроқ суҳбат қилган. Унда Уиткофф Россия-Америка музокараларини қандай ташкил этиш ҳақида маслахат бергани айтилмоқда. Хусусан, Россия ва АҚШ президентлари Украина раҳбари Володимир Зеленскийнинг Оқ уйга ташрифигача телефон орқали мулоқот қилиши масаласи муҳокама қилинган.

Республикачилардан Дон Бейкон ушбу ҳолатни кескин танқид қилиб, Уиткоффга мутлақо ишониб бўлмаслигини айтди. Унинг сўзларига кўра, «Россияга пулга ёлланган агент ҳам бундан кам иш қилмаган бўларди». У Уиткоффни музокаралар жараёнидан олишни талаб қилди.

Яна бир республикачи Брайан Фитцпатрик Уиткофф ҳаракатини «жиддий муаммо» деб атади. Унинг фикрича, «бефойда қўшимча шоу ва махфий учрашувлар» дарҳол тўхтатилиши, дипломатик жараён эса давлат котиби Марк Рубио қўлида бўлиши керак.

Демократ Тед Лю эса Уиткоффни «АҚШ учун эмас, Россия учун ишлаётган одам» деб атади ва уни «чинака сотқин» сифатида таърифлади. Унингча, Трампнинг посланниги ўз ваколатларини мутлақо нотўғри қўлламоқда.

Bloomberg эълон қилган иккинчи стенограммада 29 октябрдаги Кирилл Дмитриев — Владимир Путиннинг махсус вакили Юрий Ушаков суҳбати ҳам бор. Ҳар икки ҳужжат Вашингтондаги сиёсий босимни янада кучайтирди.

Аввалроқ ҳар икки стенограмманинг ўзбек тилидаги таржимасини эълон қилган эдик.