Амир Темур таваллудининг 690 йиллигига бағишланган эсдалик тангалари сотувга чиқарилди
Бугун 31,1 грамм оғирликдаги эсдалик олтин танганинг сотиш нархи 61 426 000 сўмни, худди шу вазндаги кумуш танганинг сотиш нархи эса 1 875 000 сўмни ташкил қилмоқда.
Ўзбекистон Марказий банки томонидан Соҳибқирон Амир Темур таваллудининг 690 йиллиги муносабати билан эсдалик тангалари ва сувенир тўпламлари сотуви йўлга қўйилди.
Сотувда:
• Амир Темур сиймоси акс этган, 31,1 г оғирликдаги 2 хил дизайндаги эсдалик тангалари;
• Ҳар бири 31,1 г бўлган 3 талик сувенир тўпламлари.
Тангалар 999,9 асилликдаги олтин ва кумушдан тайёрланган бўлиб, юқори бадиий ва коллекцион қийматга эга.
Сотув нархлари ва банклардаги мавжудлик бўйича янгиланган маълумотлар Марказий банкнинг расмий веб-сайти ҳамда ижтимоий тармоқларида ҳар куни эълон қилинади.
Хусусан, 2026-йил 9-апрел соат 20:07 ҳолатига кўра, 31,1 грамм оғирликдаги эсдалик олтин танганинг сотиш нархи 61 426 000 сўмни, банк томонидан қайтариб сотиб олиш нархи эса 57 331 000 сўмни ташкил этмоқда. Худди шу вазндаги кумуш тангалар 1 875 000 сўмдан сотилмоқда, уларни қайта сотиб олиш нархи эса 919 000 сўм этиб белгиланган.
Эслатиб ўтамиз, Марказий банк 2026-йил 1-сентябрга қадар «Мустақилликнинг 35 йиллиги» эсдалик олтин тангасини зарб этади.
Амир Темурдан Жалолиддин Мангубердигача
Ўзбекистон 1994 ва 1996-йиллар Соҳибқирон таваллудининг 660 йиллиги ҳамда мустақилликнинг дастлабки йилларида Амир Темур ҳайкали тасвири туширилган кумуш тангаларни муомалага чиқарган.
1994-йил буюк мунажжим ва давлат арбоби Мирзо Улуғбек таваллудининг 600 йиллиги муносабати билан ҳам махсус тангалар зарб этилган.
1999-йил алгоритм асосчиси, буюк математик Муҳаммад ал-Хоразмий таваллудининг 1200 йиллиги муносабати билан ҳам алоҳида эсдалик тангалари тайёрланган.
2021 йилда Алишер Навоий таваллудининг 580 йиллигига бағишлаб «Хамса» достонлари тасвирланган бешта олтин сувенирдан иборат тўпламни ҳамда шоирнинг ижод жараёни акс этган 20 ва 31,1 граммлик алоҳида олтин тангаларни муомалага чиқарган.
Шунингдек, 2023-йилда моҳир саркарда ва ўзбек халқи қаҳрамони Жалолиддин Мангуберди таваллудининг 825 йиллиги муносабати билан ҳам олтин ва кумуш тангалар зарб этилди. Ушбу тангаларнинг дизайнида саркарданинг от устида қилич тутиб турган тимсоли ҳамда Ўзбекистон Республикаси харитаси акс эттирилган.
Буюк қомусий олим Абу Райҳон Беруний таваллудининг 1025 йиллиги муносабати билан 1998-йилда кумуш танга зарб этилган.
