«Anthropic» акцияларини сотиб олиш учун инвесторлар навбатга тизилмоқда

Корпоратив сунъий интеллект воситалари бозорида етакчи ҳисобланган «Anthropic» йирик инвестиция оқимига дуч келди. Инвесторлар унинг бизнесини деярли «OpenAI» даражасида баҳолашни таклиф қилмоқда.

Гарчи стартап ҳозирча акцияларни сотишдан бош тортса-да, унинг қиймати биржадан ташқари платформаларда аллақачон 700 млрд доллар атрофига яқинлашган. Бу ҳолат компаниянинг кузда кутилaётган IPO жараёни олдидан кузатилмоқда.

Венчур инвесторлар эса «Anthropic» учун янги инвестиция раундини таклиф қилмоқда. Унинг натижасида СИ-компания қиймати 800 млрд доллар ёки ундан ҳам юқори даражага чиқиши мумкинлиги «Bloomberg» томонидан маълум қилинган.

«Anthropic» қиймати 75 фоизга ошган

Сўнгги ҳафталарда «Anthropic» венчур инвесторлардан бир неча бор акция сотиб олиш таклифларини олди. Уларнинг ҳисоб-китобларига кўра, «Claude» асосчиси бўлган «Anthropic» маҳсулотлари орқали компания қиймати 800 млрд доллар ёки ундан ҳам юқори бўлиши мумкин.

Бу рақам 2026-йил февралдаги охирги инвестиция раундидаги баҳолаш – 380 млрд доллардан икки баробардан ҳам кўп. Шунга қарамасдан, компания раҳбарияти ҳозирча янги инвестиция раундини қабул қилмаган.

«Caplight» платформаси маълумотига кўра, ўтган уч ойда «Anthropic» қиймати 75 фоизга ошган ва ҳозир тахминан 688 млрд доллар атрофида баҳоланмоқда.

Инвесторлар қизиқишининг кучайиши асосан компания даромадларининг тез ўсиши ва айниқса дастурчилар учун мўлжалланган «Claude Code» СИ-ассистентининг жадал ривожланиши билан боғлиқ.

«Anthropic» код ёзиш, киберхавфсизлик ва бизнес жараёнларини автоматлаштиришга қаратилган бир қатор СИ воситаларини ишлаб чиққан. Бу маҳсулотлар корпоратив мижозлар томонидан фаол қабул қилинмоқда ва даромадларнинг кескин ошишига ҳамда «OpenAI» билан рақобатнинг кучайишига олиб келмоқда.

«OpenAI»га бўлган қизиқишнинг пасайиши

«OpenAI»га бўлган инвесторлар қизиқиши пасайгани фонида бозор эътибори Anthropic томон силжимоқда, деб ёзади «Bloomberg».

«Next Round Capital» раҳбари Кен Смитнинг айтишича, у бир неча ҳафта давомида юзлаб институционал мижозлар орасидан «OpenAI» акцияларини сотиб олмоқчи бўлган харидорларни топа олмаган. Аксинча, мижозлар тахминан 2 млрд доллар маблағни «Anthropic» улушларини сотиб олишга йўналтиришга тайёр эканини билдирган.

«Caplight» маълумотларига кўра, 2026-йил январ–март даврида «OpenAI» акцияларини сотмоқчи бўлганлар сони харидорлардан беш баробар кўп бўлган. Бу ҳолат 2025-йил охиридаги вазиятга қараганда кескин ўзгарган – ўша пайтда харидорлар устунлик қилган.

Ҳар икки компания ҳам 2026-йил кузида IPO (биржага чиқиш)га тайёргарлик кўрмоқда ва акцияларни рухсатсиз қайта сотишни чеклайди. Шунга қарамай, иккиламчи бозорларда бу қимматли қоғозларга кириш имконияти сақланиб қолмоқда.

Аналитик Адам Кроулининг фикрича, «OpenAI» ва «Anthropic» баҳолари ўртасидаги фарқ инвесторларни «Anthropic»ни кўпроқ сотиб олишга ундамоқда, чунки улар келажакдаги ўсишга кўпроқ умид қилмоқда.

«OpenAI» ёки «Anthropic»?

«Seeking Alpha» таҳлилчилари апрел ойи бошида инвесторларни «OpenAI» ва «Anthropic» IPO’си олдидан эҳтиёткор бўлишга чақирган.

Крис Демутнинг фикрича, «Anthropic» баҳоси «бироз кўпроқ асосли» кўринади. Унинг айтишича, ҳозир ҳар икки компания ҳам инвесторлар орасида жуда оммабоп, лекин уларнинг акциялари аллақачон анча қимматлашиб кетган.

Жонатан Вебер ҳам ҳозирги пайтда «Anthropic»ни кўпроқ жозибадор деб ҳисоблайди. Унингча, стартапнинг дастурлаш учун СИ ечимларга эътибори унга «ўзига хос бозор устунлиги» беради, шунингдек, «Alphabet» ва «Amazon» томонидан қўллаб-қувватланиши хавфларни камайтиради.

Жулия Остиан эса инвесторларга IPO вақтида шошилмасликни маслаҳат беради. Унинг фикрича, икки компания ҳам ҳозир жуда қиммат. Масалан, «OpenAI» қиймати унинг йиллик даромадидан 35 баравар юқори – бу эса у «катта зарар кўраётган компания учун жуда юқори ва ҳатто ғайритабиий даража» деб таърифланган.

У якунда шундай деган: Anthropicни у нисбатан қизиқроқ инвестиция деб ҳисоблайди, лекин ҳозирги шароитда ҳеч бир компанияни «ҳақиқатан ҳам идеал инвестиция» деб бўлмаслигини таъкидлайди.