Apple Ҳиндистон орқали Россияга iPhone олиб кирилишини чеклашга киришди
Apple ўз қурилмалари норасмий йўллар билан Россияга олиб кирилишини чеклаш учун Ҳиндистон дўконларига жиддий огоҳлантиришлар йўллади.
Американинг технологик гиганти Apple ўз смартфонларининг Ҳиндистон орқали Россия ва бошқа давлатларга норасмий ва ўғринча йўллар билан кириб келишини тўхтатиш бўйича қатъий чоралар кўрмоқда. Бу ҳақда маҳаллий MoneyControl нашри хабар берди.
Маълумотларга кўра, расмий дистрибюторлар Ҳиндистондаги ритейлерларга махсус мактуб йўллаб, сотилган iPhone қурилмалари 90 кун ичида хорижий SIM-карталар билан фаоллаштирилгани аниқланса, уларга нисбатан катта миқдордаги жарималар қўлланиши ва дўкон коди блокланиши ҳақида огоҳлантирган. Айниқса, яқинда чиқарилган iPhone 17 моделлари катта назоратга олинган.
Apple Россияда ўз маҳсулотларини расман сотишни 2022 йилда тўхтатган ва Apple Pay каби хизматлар ишлашини чеклаганди. Аммо шундан бери мамлакатга янги моделлар параллел импорт ва хусусий етказиб берувчилар орқали кириб келмоқда.
MoneyControl’нинг баҳолашича, 2025 йил октябрь ойида Ҳиндистондан жаҳон бозорига 1,6 млрд доллар қийматда iPhone экспорт қилинган. Бу смартфон экспортининг қарийб учдан бир қисми ва барча электроника экспортининг 40 фоизини ташкил этади. Шу миқдорнинг 3–5 фоизи норасмий етказиб беришлар ҳиссасига тўғри келади. Уларнинг деярли ярми Россия бозорига йўналтирилади.
Бошқа муҳим йўналишлар сифатида Африка, Яқин Шарқ ва Жануби-Шарқий Осиё давлатлари қайд этилган — бу минтақаларда талаб юқори ва фойда ҳам кўпроқ, дейилади таҳлилларда.
