Apple раҳбари Тим Кук 2026 йилда истеъфога чиқиши мумкин

Apple компанияси бош директори Тим Кук келаси йил лавозимини тарк этиши мумкин. Бу ҳақда Financial Times ўз манбаларига таяниб хабар берди. Хабарга кўра, компаниянинг кузатув кенгаши ва юқори раҳбарияти аллақачон Кукнинг кетишига тайёргарликни фаол бошлаган.

Унинг ўрнига Apple’нинг аппарат таъминоти бўйича вице-президенти Жон Тернус келиши мумкин. Ҳали расмий қарор қабул қилинмаган, бироқ Тернус компаниядаги энг юқори даражадаги мутахассис сифатида кўрилмоқда.

Манбалар таъкидлашича, ушбу кадр ўзгариши Apple’нинг ҳозирги молиявий натижалари билан боғлиқ эмас — компания йил якунига кўра рекорд даражада iPhone сотувларини кутмоқда. Шунга қарамай, раҳбарият янги етакчилар жамоасига йил бошида ишни бошлаш имконини беришни хоҳламоқда, айниқса июн ойидаги WWDC конференцияси ва сентябрдаги iPhone тақдимоти олдидан.

Тим Кук 2011 йилдан буён Apple бош директори лавозимида ишлаб келмоқда. У бу лавозимни компания ҳаммуассиси Стив Жобсдан қабул қилиб олган эди. Кук ўзининг эҳтимолий кетиши ҳақида гапирар экан, Apple’да «ўзининг ўрнини босадиган шахсни аниқ белгилаш бўйича мукаммал режа» борлигини айтган.

Bloomberg нашрининг ёзишича, Кук истеъфога чиққанидан сўнг ҳам компанияда қолиб, кузатув кенгаши раиси сифатида фаолият юритиши мумкин.