«Apple» яқинда йирик харидни амалга оширади

«Apple» 30-апрел куни ҳисоботдан кейин ўз молиявий сиёсатини ўзгартиришини эълон қилди. «MarketWatch»нинг ёзишича, бу технологик гигант сунъий интеллект соҳасида йирик харидни амалга оширишни режалаштираётганига ишора бўлиши мумкин. Нашрга кўра, эҳтимолий мақсадлардан бири – «Perplexity AI» стартапи.

Бу компания «Apple»нинг ҳисоботдан кейинги конференц-қўнғироғида кутилмаганда мақтовга сазовор бўлди. Ушбу стартапни харид учун эҳтимолий номзод сифатида «Wedbush Securities» таҳлилчиси ва «технооптимист» Дэн Ивес ҳам қайд этган.

Нақд пул ва кредит сиёсати

30 апрель куни бўлиб ўтган конференц-қўнғироқда «Apple» молиявий сиёсатини ўзгартираётганини маълум қилди ва энди нақд пул ҳамда қарзни алоҳида баҳолашини айтди. Компаниянинг молия директори Кэвин Парехнинг таъкидлашича, бу ёндашув бизнесни қўллаб-қувватлаш учун пул ва қарз ресурсларидан қандай фойдаланиш бўйича янада самарали қарорлар қабул қилишга ёрдам беради.

Бунгача, 2018-йилдан бери «Apple» ўзининг катта нақд пул захирасини қисқартириб келаётган эди. Компания вақт ўтиши билан пул миқдорини қарз даражасига тенглаштиришга интилган. Бу сиёсат «net-cash-neutral position» деб аталган. Шу мақсадда компания бозордан ўз акцияларини фаол равишда қайта сотиб олган ва дивиденд тўловларини оширган.

«MarketWatch»нинг ёзишича, инвесторлар учун бу сиёсатдан воз кечиш «Apple»га йирик инвестициялар, айниқса сунъий интеллект соҳасида, амалга оширишда кўпроқ эркинлик бериши мумкинлигидан далолат беради.

«Apple» нимани сотиб олиши мумкин?

«Apple» олдида сунъий интеллектни кучайтириш вазифаси турибди, чунки бу соҳада у рақобатчиларидан орқада қолмоқда. Компания «Google» билан ҳамкорлик қилиб, унинг «Gemini»ни янгиланган «Siri» овозли ёрдамчиси учун ишлатмоқда. Шу билан бирга, «Apple» ўзининг базавий моделларини ҳам ишлаб чиқмоқда. Бу икки йўналиш ўртасидаги мувозанат қўшимча инвестицияларни талаб қилади, деб айтди компаниянинг олдинги раҳбари Тим Кук.

«MarketWatch» маълумотига кўра, ташқи СИ-компанияни сотиб олиш ҳақидаги миш-мишлар бир неча ойдан бери давом этмоқда. Ўтган йили «Bloomberg» «Apple»нинг «Perplexity AI» стартапини сотиб олиш масаласини ички муҳокама қилганини хабар қилган эди. Бу компания агентли (agent-based) ечимлари билан танилган.

«Perplexity» кутилмаганда «Apple»нинг 30-апрелдаги ҳисоботидан кейинги конференц-қўнғироғида ҳам тилга олинди. Компания молия директори Кэвин Парех шундай деди:

«Apple» процессорлари ва ягона хотира архитектураси туфайли «Perplexity» каби етакчи СИ ишлаб чиқувчилар «Mac»ни корпоратив СИ-ассистентлар яратиш учун асосий платформа сифатида танламоқда».

Жорий йилда «Apple» аллақачон кутилмаган битимни амалга оширган – у ёпиқ СИ-аудио стартап «Q.ai»ни сотиб олди. Битим суммаси очиқланмаган, аммо «Financial Times» уни тахминан 2 млрд долларга баҳолаган. Агар бу тасдиқланса, у «Apple» тарихидаги иккинчи энг йирик харид бўлади. Биринчи ўринда эса 2014-йилда 3 млрд долларга сотиб олинган «Beats Electronics» турибди.

Таҳлилчилар нима демоқда?

«MarketWatch»га кўра, «Apple»нинг қўшилиш ва харидлар стратегияси, эҳтимол, сунъий интеллект компанияларини ўз ичига олади. «Wedbush Securities» таҳлилчиси Дэн Ивес шундай деди:

«Бизнинг фикримизча, «Apple»даги раҳбарият ўзгариши ва янги бош директор келиши келгусидаги харидларга ишора қилади ва бу инвесторлар учун ижобий сигнал. [...] «Perplexity» биз учун эҳтимолий номзодлардан бири бўлиши мумкин».

«Johnson Investment Council» бош инвестиция директори Чарлз Рейнхарт ҳам шундай фикр билдирди:

«Биз СИга бўлган талаб «Apple» бизнесига таъсир қилаётганини аниқ кўряпмиз. Айниқса «Mac mini» ва «Mac Studio» каби маҳсулотларга талаб юқори – улар СИ ва агентли вазифалар учун тобора кўпроқ ишлатилмоқда».

Унинг фикрича, айнан шу омиллар «Apple»нинг молиявий сиёсатини ўзгартириш қарорга таъсир қилган бўлиши мумкин.

Америка банки таҳлилчиси Вамси Моҳан эса компаниянинг молиявий ҳолатига эътибор қаратди. Унинг айтишича, «Apple» молиявий жиҳатдан «қарз билан етарлича юкланмаган», яъни у янги инвестициялар учун қўшимча қарз жалб қилиш имконига эга. Шу билан бирга, у «Apple» харажатлари рақобатчилар – гиперскейлер компанияларникидан паст бўлиб қолишини тахмин қилмоқда, чунки компания гибрид СИ стратегиясига амал қилишда давом этмоқда.