АҚШ бир йилда 85 мингта визани бекор қилди
АҚШ Давлат департаменти жорий йил бошидан буён барча тоифалар бўйича 85 минг визани бекор қилганини билдирди. Бу ўтган йилдаги кўрсаткичдан икки баравар юқори.
АҚШ ташқи сиёсат идораси CNN орқали маълум қилишича, 2025 йил бошидан буён мамлакат барча тоифалар бўйича 85 мингга яқин визани бекор қилган. Бу рақам ўтган йилги кўрсаткичдан икки баравар кўп бўлиб, визаларнинг қатъий назорат қилинаётганини кўрсатади. Айниқса, талабалар учун мўлжалланган визалар бўйича бекор қилиш ҳодисалари кескин кўпайган: бекор қилинган визаларнинг 8 мингдан ортиғи айнан талабалар тоифасига тўғри келади.
АҚШ Давлат котиби Марко Рубио март ойида «ҲАМАСни қўллаб-қувватлагани» айтиладиган камида 300 нафар хорижий талабанинг визаси бекор қилинганини маълум қилган эди. Мамлакат хавфсизлик идоралари ўқувчи доирасидаги фаоллик ва ижтимоий тармоқлардаги чиқишларни ҳам таҳлил қилаётгани таъкидланган.
Август ойида АҚШ Давлат департаменти 55 миллиондан зиёд амалдор визасига эга фуқароларнинг миграция қоидаларини бузиш-бузмаслиги бўйича кенг қамровли текширув ўтказаётганини маълум қилган. Қоидаларни бузиш ҳолати аниқланса, виза бекор қилиниши ёки шахс мамлакатдан чиқарилиши мумкинлиги эслатилган.
Октябр ойида эса АҚШда фаол Чарли Киркнинг ўлдирилгани билан боғлиқ ижтимоий тармоқдаги баёнотлари туфайли яна олти нафар хорижий фуқаронинг визаси бекор қилинди. Миграция сиёсатидаги кескин назорат АҚШда хавфсизлик ва ички сиёсий муҳит билан боғлиқ равишда кучайтирилмоқда.
Мамлакатда виза сиёсатига оид янгиланишлар халқаро талаба оқими ва бизнес сафарларига таъсир қилиши мумкинлиги таъкидланмоқда. Виза бекор қилиш динамикаси юқори даражада сақланса, 2025 йилда умумий рақам рекорд кўрсаткичларга етиши эҳтимол қилинмоқда.
