АҚШ элчихонаси ўзбекистонлик мухлислар учун «FIFA PASS» тизими қандай ишлашини тушунтирди

АҚШнинг Ўзбекистондаги элчихонаси футбол бўйича 2026 йилги Жаҳон чемпионатига (ЖЧ-2026) чипта харид қилган мухлислар учун виза суҳбатини кутиш вақтини қисқартиришга ёрдам берувчи «FIFA PASS» (устувор ёзилиш тизими) тартибига ойдинлик киритди. Ушбу дастур мусобақани бевосита стадиондан томоша қилишни режалаштираётган ўзбекистонликлар учун виза олиш жараёнидаги бюрократияни бироз енгиллаштиришни кўзлайди.

Ушбу имтиёздан фойдаланиш учун мухлислар чиптани фақатгина Халқаро футбол федерациясининг расмий ресурси —fifa.com/tickets сайти орқали сотиб олган бўлиши шарт. Шундан сўнг, шахсий кабинетда «FIFA PASS» дастурида иштирок этиш учун розилик шаклини юбориш керак. Бунда исм-шариф ва паспорт рақами хорижга чиқиш паспортидаги маълумотлар билан тўлиқ мос келишини диққат билан текшириш талаб этилади.

Виза олишнинг кейинги қадамлари

Расмий чипта харид қилингач ва тасдиқлангач, талабгор АҚШ Давлат департаментининг расмий виза порталида «DS-160» онлайн-анкетасини тўлдириши лозим. Ариза тўлдириш жараёнида ҳам паспорт маълумотлари FIFA профилидаги ахборот билан бир хил бўлиши қатъий талаб этилади.

Виза йиғими тўлангандан ва мухлисда турнирга ҳақиқий чипта борлиги тизим орқали тасдиқлангандан сўнг, аризачи суҳбатга ёзилиш учун устувор навбатга (тезлаштирилган йўлакка) кириш ҳуқуқини қўлга киритади.

Чипта — виза учун кафолат эмас

АҚШ элчихонаси суҳбатга ёзилишнинг соддалаштирилган тартиби стандарт хавфсизлик талабларини бекор қилмаслигини алоҳида таъкидлади. Яъни, Жаҳон чемпионати чиптасининг мавжудлиги виза берилишини юз фоиз кафолатламайди.

Якуний қарорни консуллик офицери шахсий суҳбат давомида қабул қилади. Шу боис, элчихона талабгорларга анкетада аниқ ва тўғри маълумот беришни ҳамда суҳбат давомидаги саволларга тайёр туришни тавсия қилмоқда.

Эслатиб ўтамиз, 2026 йилнинг 11 июнидан 19 июлигача АҚШ, Канада ва Мексика яшил майдонларида бўлиб ўтадиган Жаҳон чемпионати Ўзбекистон учун тарихий аҳамиятга эга. Мамлакат миллий терма жамоаси ўз тарихида илк бор жаҳон биринчилигига йўлланмани қўлга киритган ва «K» гуруҳида Колумбия (17 июн, Мексикада) Португалия (23 июн, АҚШда) ва Конго ДРга (27 июн, АҚШда) қарши майдонга чиқади.