AQSH Isroilni ilk bor Eronga berilayotgan zarbalardan tiyilishga chaqirdi — «Axios»
Vashington qo‘shma harbiy amaliyot boshlanganidan beri ilk bor Isroilga Eronning energetika va neft infratuzilmasiga hujum qilishni to‘xtatish bo‘yicha cheklov qo‘ydi.
«Axios» nashri o‘zining uchta manbasiga tayanib xabar berishicha, Oq uy Isroil rahbariyati va SAHAL Bosh shtabiga tegishli ogohlantirishni yetkazgan. Tramp ma’muriyati ittifoqchisini tiyib turish uchun uchta asosiy sababni keltirmoqda. Jumladan:
Aholining jabrlanishi: Energetikaga beriladigan zarbalar amaldagi rejimni qo‘llab-quvvatlamaydigan tinch aholiga zarar yetkazadi;
Strategik aktiv: Tramp Eron neft sanoatini urushdan keyin AQSH ishlashi mumkin bo‘lgan muhim aktiv sifatida ko‘rmoqda (Venesuela misolidagidek);
Qo‘shnilarga tahdid: Keskinlikning kuchayishi Eronni qo‘shni davlatlardagi neft obyektlariga hujum qilishga majburlashi mumkin.
Trampning «so‘nggi chora» strategiyasi
Prezident Tramp Eron neft infratuzilmasini butunlay yo‘q qilishni faqat o‘ta favqulodda holat — Tehron Fors ko‘rfazidagi yoqilg‘i obyektlariga ataylab hujum qilgan taqdirdagina qo‘llaniladigan chora deb hisoblaydi.
Tramp «Truth Social» tarmog‘ida Eronni ochiq ogohlantirib, agar ular bunday qadamga jasorat qilsa, javob «20 barobar kuchliroq» bo‘lishini va bu Eronni davlat sifatida tiklanishini imkonsiz qilib qo‘yishini yozdi.
Siyosiy doiralardagi xavotir
Hatto AQSHdagi qat’iy siyosat tarafdorlari ham ehtiyotkorlikka chaqirmoqda. Senator Lindsi Grehemning fikricha, neft iqtisodiyoti «rejim qulaganidan keyin» Eron xalqi uchun yangi hayot qurishda zarur bo‘ladi.
AQSH Mudofaa vaziri Pit Hegset yaqinda yoqilg‘i omborlariga berilgan zarbalardan Vashingtonni uzoqlashtirdi. U Amerika kuchlari bunday nishonlarga hujum qilishda ishtirok etmaganini alohida ta’kidladi.
