АҚШ Мадурога нисбатан расмий айблов қўйди
АҚШ адлияси Венесуэла раҳбарини наркотерроризм ва халқаро жиноятлар билан боғлиқ ишда айблаб, ишни судга оширди.
АҚШ адлия органлари Венесуэла президенти Николас Мадуро ва унинг рафиқаси Силия Флоресга нисбатан Ню Йорк жанубий округи федерал судида расмий айблов қўйилганини эълон қилди. Айбловлар наркотерроризм, АҚШ ҳудудига кокаин контрабандаси ва қурол ҳамда портловчи қурилмаларни сақлаш билан боғлиқ.
АҚШ Бош прокурори Пэм Бондининг маълум қилишича, Мадуро АҚШ хавфсизлигига қарши қаратилган жиноий ҳаракатларда иштирок этгани гумон қилинмоқда. Унинг сўзларига кўра, мазкур иш халқаро наркотрафикка қарши кураш доирасида олиб борилган ва айбланувчилар Америка судлари олдида жавоб бериши керак.
Бонди таъкидлашича, операция АҚШ ҳарбий ва ҳуқуқни муҳофаза қилувчи идораларининг мувофиқлаштирилган ҳаракатлари натижасида амалга оширилган. У шунингдек, ушбу қарорни қўллаб-қувватлагани учун АҚШ президенти Дональд Трампга миннатдорлик билдирди.
3 январга ўтар кечаси АҚШ қўшинлари Венесуэла пойтахти Каракасда жойлашган бир қатор стратегик объектларга, жумладан, авиация ва ҳарбий базаларга зарбалар бергани маълум қилинди. Оқ уй бу ҳаракатларни «кенг кўламли операция» деб баҳолади. Шунингдек, Мадуро ва унинг рафиқаси қўлга олиниб, мамлакат ҳудудидан олиб чиқилган.
Маълумот учун, АҚШ ҳукумати 2020 йилда ҳам Мадурога нисбатан наркотерроризм бўйича сиртдан айблов эълон қилган эди. 2025 йил август ойида эса АҚШ Давлат департаменти уни ҳибсга олиш учун белгиланган мукофот миқдорини 50 миллион долларгача оширган.
Бу воқеа Венесуэладаги сиёсий инқироз ва АҚШ–Венесуэла муносабатларида кескинлик янада чуқурлашаётганидан далолат беради.
