АҚШ Мадурони қўлга олди: Z-блогерлар ҳайратда

АҚШнинг Венесуэлага қарши ўтказган тезкор ҳарбий амалиёти, президент Николас Мадуронинг ҳибсга олиниши билан якунланиб, Россиядаги ҳарбийларга мойил Z-ҳамжамиятда кутилмаган резонансга сабаб бўлди. Россия ва Венесуэла ўртасида стратегик шериклик шартномаси мавжуд бўлишига қарамай, бир қатор Z-каналлар АҚШ ҳаракатларини очиқча мақтади.

Маълумотларга кўра, амалиёт бор-йўғи 30 дақиқа давом этган. У авиа зарбалар, ҳаво ҳудудида «коридор» очиш ва МРБ ҳамда махсус кучлар иштирокида Мадурони қўлга олиш операциясини ўз ичига олган. «Военний осведомител» канали буни «эталон СВО» деб атаб, «келишди, ишни қилишди ва чиқиб кетишди», дея таърифлади.

«Сводки ополчения Новороссии» канали эса хавотирли хулоса чиқариб, «шундай бўлса, Путини ҳам ўғирлаб кетишлари мумкин», деган фикрни илгари сурди. «Два майора» канали амалиётни «жуда саводли, тезкор ва самарали» деб баҳолаб, бу сценарий илк кунларда Россиянинг Украинадаги режаларига ўхшаш бўлганини таъкидлади.

«Рибар» канали АҚШ ҳаракатларини таҳлил қилиб, 2022 йилда Россия армиясининг Ҳостомел аэродроми ва Антонов кўпригини қўлга олишга уринишларини эслади. Бироқ, каналнинг таъкидлашича, ўша тактик ютуқлар стратегик натижага айлантирилмаган.

Экспертларга кўра, Венесуэлага қарши амалиёт АҚШнинг классик «қисқа, кучли ва аниқ зарба» доктринасини яна бир бор намоён қилди. Амалиёт арафасида Кариб денгизига USS Gerald Ford авиаташувчи ҳарбий кемаси, 11 та ҳарбий кема ва 15 минг нафар ҳарбий жойлаштирилгани қайд этилди.

«CNN» манбаларига кўра, операцияга АҚШ президенти Доналд Трамп шахсан рухсат берган, Мадуронинг жойлашуви эса МРБ томонидан аниқланган. Бу ҳолат Россиядаги ҳарбий таҳлилчилар орасида замонавий уруш усуллари ҳақида жиддий муҳокамаларни бошлаб берди.