АҚШ Сенати ҳукумат фаолиятини тиклаш тўғрисидаги қонунни маъқуллади
39 кунлик рекорд шатдаунга чек қўйиш учун АҚШ Сенати янги бюджет асосини тасдиқлади. Энди ҳужжатни Конгресс ва президент Трамп тасдиқлаши керак.
АҚШ Сенати ҳукумат фаолиятини тиклаш ва шатдаунни тўхтатишга қаратилган қонун лойиҳасини қабул қилди. CNN нашрининг хабар беришича, 60 нафар сенатор «ҳа», 40 нафари эса «йўқ» деб овоз берган. Бу қадам 1 октябрда бошланган ва 39 кун давом этган ҳукуматнинг қисман ишламай қолишига барҳам бериш мақсадида ташланди.
Эндиликда ҳужжат Қонунчилик палатасига юборилади. У ерда ҳам тасдиқланса, сўнгги босқичда уни АҚШ президенти Доналд Трамп имзолаши лозим. Бу жараён бир неча кун давом этиши мумкин.
Politico нашрининг ёзишича, ушбу қонун янги молиявий йил учун асосий бюджет режасининг бошланғич нуқтаси бўлади. У орқали Қишлоқ хўжалиги вазирлиги, Озиқ-овқат ва дори воситалари назорати бошқармаси (FDA), ветеранлар масалалари бўйича департамент, ҳарбий қурилиш лойиҳалари ҳамда Конгресс фаолиятини молиялаштириш режалаштирилган.
Қолган федерал идоралар эса 30 январгача вақтинчалик молиялаштирилади. Бундай тақсимотнинг сабаби — бюджет бўйича сиёсий келишмовчиликлар, хусусан, Obamacare дастури ва Medicaid учун субсидиялар масаласида демократлар ва республикачиларнинг қарама-қаршилигида бўлган.
Шатдаун АҚШ тарихидаги энг узоқ давом этган ҳукумат тўхташи сифатида қайд этилди. Бу вақт ичида бир қатор фуқаролик хизматлари тўхтаб қолди, айрим агентликлар вақтинчалик ёпилди, давлат ходимлари маошсиз ишлашга мажбур бўлди.
