АҚШ «тинчлик режаси»ни тўрт пакетга бўлди — Украинага фақат биттаси тааллуқли

The New York Times нашрнинг ёзишича, АҚШ расмийлари Россия билан музокаралар олиб борилаётган «тинчлику режаси»ни тўрт йирик пакетга бўлган. Нашр манбаларининг таъкидлашича, бу пакетлар бўйича муҳокамалар параллел равишда кетмоқда ва уларнинг биринчиси Украина суверенитетига оид масалаларни ўз ичига олади. Жумладан, Украина армияси қувватини чеклаш, ракеталар масофасини қисқартириш каби таклифлар шу ерда кўрилган.

Қолган уч пакетда эса ҳудудий имтиёзлар, урушдан кейинги АҚШ–Россия иқтисодий ҳамкорлиги ва кенгайтирилган Европа хавфсизлиги масалалари бор. Манбага кўра, дастлабки 28 банддан иборат вариантни Украина ва Европа мутлақо қабул қила олмаётгани сабабли уни қайта ишлашга тўғри келган.

Бироқ янгиланган таклиф ҳам Москвада хурсандчилик билан кутиб олинмаган. Нашрнинг ёзишича, Владимир Путиннинг бундай реакцияси аввалдан кутилган эди, чунки Кремл ўз стратегик мақсадларидан асло чекинмаган.

«Путин бир неча ҳафта олдин қимматга тушса ҳам, узоққа чўзилса ҳам ўз мақсадларимизга эришамиз, деб айтган эди. Бу уларнинг тафаккури», — деган АҚШ давлат котиби Марко Рубио бу ҳақда.

Вашингтоннинг махсус элчилари Стив Уиткофф ва Жаред Кушнернинг Кремлда Путин билан беш соатлик учрашуви шу пайтгача бўлиб ўтган энг узоқ музокара бўлди. Ана шу учрашувдан кейин таклифларни тўрт пакетга ажратиш маълум қилинди.

Украинанинг ўзи эса бир қатор принципиал шартларни қўймоқда ва улардан чекиниш нияти йўқ. Европа ва АҚШда ҳам бу ташаббуслар самарасига нисбатан жиддий шубҳалар мавжуд.

Defense Priorities таҳлилчиси Женнифер Кавана фикрича, ҳар қандай келишув оғир ва адолатсиз бўлиши мумкин: «Россия учун минимал мақбул шартлар ва Украина учун қабул қилинадиган вариантлар ўртасидаги фарқ ҳали жуда катта».