АҚШ ва Украина президентлари ёпиқ форматда учрашди

АҚШ президенти Доналд Трамп Оқ уйда Украина президенти Володимир Зеленскийни қабул қилди. «Reuters» нашрининг хабар беришича, учрашув ёпиқ форматда, журналистлар иштирокисиз ўтказилган ва бир соатдан ортиқ давом этган.

«Patriot» лицензиялари муҳокама қилинди

Учрашувдан сўнг Володимир Зеленский музокараларни «яхши ўтганини» маълум қилди. Унинг сўзларига кўра, томонлар «Patriot» ҳаво ҳужумидан мудофаа тизими учун тутувчи ракета ишлаб чиқариш лицензиялари ҳамда бошқа ташаббусларни муҳокама қилган.

Шунингдек, раҳбарлар Россия–Украина урушига барҳам бериш учун дипломатик жараённи жонлантириш масаласига ҳам эътибор қаратган.

Украина президенти Трамп билан тинчлик музокараларини қайта бошлаш ҳақида гаплашганига ишора қилди.

Қайд этилишича, Трампнинг махсус вакиллари Стивен Уиткофф ва Жаред Кушнер яқин ҳафталарда Украинага ташриф буюриши мумкин.

Янги ғоялар изланмоқда

«РБК-Украина» суҳбатдошининг таъкидлашича, учрашув «ўн баллик тизимда камида саккиз баллга» баҳоланган ва музокаралар йўналишини қайта жонлантиришга хизмат қилган.

Аввалроқ АҚШ давлат котиби Марко Рубио Доналд Трамп ва Россия президенти Владимир Путин ўртасида Анкорижда ўтган саммит кутилган натижани бермаганини айтган эди. Унинг фикрича, Россия–Украина урушини тўхтатиш учун энди «янги ғоялар» талаб этилади.

Оқ уй матбуот котиби Кэролайн Ливитт ҳам Трамп ва Зеленский учрашувини «самарали ва ижобий» деб баҳолаган.