АҚШ Венесуэла осмонини ёпди: Трамп кескин баёнот берди
Доналд Трамп Венесуэла устида «парвоздан холи ҳудуд» эълон қилди, бу қарор АҚШ–Венесуэла муносабатлари янада кескинлашиши мумкинлигидан дарак бераётгани айтилмоқда.
АҚШ Президенти Доналд Трамп Венесуэла устидаги ҳаво маконини тўлиқ «ёпилган» деб эълон қилиб, Жанубий Америкадаги вазиятга янги сиёсий кескинлик олиб кирди. Унинг Truth Social’dagi баёноти Америка оммавий ахборот воситалари томонидан Жанубий Америка билан бўладиган эҳтимолий қарама-қаршиликнинг янги босқичи сифатида баҳоланди.
Трамп ўз мурожаатида барча авиакомпаниялар, учувчилар, наркобошқарув жараёнида қатнашувчилар ва одам савдоси билан шуғилланувчи тузилмаларга мурожаат қилиб, Венесуэла устидаги осмон «бутунлай ёпилгани»ни алоҳида таъкидлади. Унинг сўзларига кўра, мазкур қарор фавқулодда хавфсизлик чораларидан келиб чиққан ҳолда қабул қилинган.
«Парвоздан холи ҳудуд» эълон қилиниши мамлакат узра ҳар қандай парвоз — у хоҳ тижорат, хусусий ёки хоҳ ҳарбий бўлсин, тақиқланишини англатади. Бундай чора одатда ҳарбий операциялар ёки кескин геосиёсий босим олдидан қўлланилади. Шу жиҳатдан мутахассислар Трампнинг баёнотини Вашингтоннинг Каракасга нисбатан босимини янада кучайтириш сифатида талқин қилмоқда.
Венесуэла ҳукумати ҳозирча расмий изоҳ бермади, аммо мамлакат расмийлари аввал ҳам АҚШнинг бундай усулларини «суверенитетга аралашув» дея танқид қилган. Каракас ва Вашингтон ўртасидаги муносабатлар сўнгги йилларда нефт санкциялари, миграция кризиси ва ички сиёсий зиддиятлар туфайли кескинлашган эди.
АҚШ ҳарбий таҳлилчиларига кўра, бу баёнот эҳтимолий ҳарбий операцияга тайёргарлик сифатида қаралиши мумкин. Агар Вашингтон осмонни ёпишни амалий даражага олиб чиқса, Венесуэла ҳаво ҳудудига кирган ҳар қандай учувчи аппарат «қонуний нишон» деб баҳоланади.
