АҚШ вице-президенти ядровий синовлар сабабини изоҳлади

АҚШ ядровий қуролларининг ишлашига ишонч ҳосил қилиш учун даврий равишда синовлар ўтказиши зарур. Бу ҳақда вице-президент Жей Ди Вэнс Reuters агентлигига билдирган.

«Америка миллий хавфсизлигининг муҳим қисми — ядровий арсеналимиз ҳақиқатан ҳам тўғри ишлаётганини таъминлашдир», — деган Вэнс.

Унинг сўзларига кўра, АҚШ ҳозирда қуроллар соғлом ҳолатда эканини билади, аммо уларни мунтазам назорат қилиш зарур.

Президент Доналд Трамп 30 октябр куни Пентагонга ядровий қурол синовларини тайёрлашни буюрди. Reuters агентлигининг ёзишича, бу 33 йиллик танаффусдан кейинги илк ядровий машқлар бўлиши мумкин. Трамп қайси турдаги синовлар ҳақида гап кетганини аниқлаштирмади.

Трамп ўз қарорини бошқа давлатлар ядровий қурол синаётгани билан изоҳлади. 28 октябрда Россия президенти Владимир Путин ядровий каллаккаг эга «Посейдон» сувости аппарати ва чегарасиз масофага учиш қобилиятига эга «Буревестник» қанотли ракета синовлари якунланганини маълум қилган эди.

Путиннинг матбуот котиби Дмитрий Песков Трампнинг баёнотига жавобан «Буревестник» синови «ядровий синов» ҳисобланмаслигини айтди ва ҳозирда бу йўналишда мораторий амал қилаётганини эслатди. «Агар кимдир мораторийдан чекинса, Россия вазиятга мос равишда ҳаракат қилади», — деган Песков.

АҚШ президенти эса Москва ва Вашингтон «кимўзарга ўйин ўтказмаётгани»ни таъкидлаб, «дунёдаги энг кучли атом сувости кемаси» Россия соҳилларига яқин жойлашганини қўшимча қилди.

БМТнинг Қуролсизланиш тадқиқотлари институти (Женева) илмий ходими Павел Подвиг РБКга берган изоҳида Трампни ядровий синовларга ундаган омиллардан бири — Хитойнинг ядровий арсенални кенгайтириши бўлиши мумкинлигини таъкидлаган. «Трампда Америка ўз қудратини тўлиқ намоён этмаётгани ҳисси пайдо бўлгандек», — деган эксперт.