AQSH viza olishda majburiy garov puli to‘lash tartibini joriy qildi

AQSH Davlat departamenti viza muddati tugaganidan keyin mamlakatda noqonuniy qolib ketish holatlari ko‘p kuzatiladigan qator davlatlar fuqarolari uchun yangi moliyaviy cheklovlarni e’lon qildi. Endi ushbu davlatlarning fuqarolari B1/B2 (sayyohlik va biznes) vizasini olishda 5 000 dan 15 000 dollargacha miqdorda majburiy garov puli (visa bond) to‘lashlari talab etiladi.

Yangi tartibning mohiyati

Mazkur tartib AQSH Milliy xavfsizlik vazirligining viza muddatini buzish bo‘yicha hisobotlariga asoslangan bo‘lib, u sinov tariqasida joriy etilmoqda. Garov pulining aniq miqdori ($5,000, $10,000 yoki $15,000) konsullik suhbati davomida konsul tomonidan belgilanadi.

Ushbu mablag‘ sayyoh AQSH hududini belgilangan muddat ichida tark etgan taqdirda to‘liq qaytarib beriladi. Biroq, agar shaxs viza muddatini buzsa, mamlakatda qolib ketsa, viza turini o‘zgartirishga harakat qilsa yoki boshpana so‘rab murojaat qilsa, garov mablag‘i AQSH davlati foydasiga musodara qilinadi.

Ro‘yxatga qaysi davlatlar kiritilgan?

2026-yilning 18-martida yangilangan rasmiy ma’lumotlarga ko‘ra, ushbu cheklovlar qo‘llaniladigan 50 ga yaqin davlatlar ro‘yxati shakllantirilgan. E’tiborli jihati, ro‘yxatda O‘zbekiston, Qozog‘iston va Afg‘oniston mavjud emas.

Ammo Markaziy Osiyo mintaqasidagi boshqa qo‘shni davlatlar ushbu cheklovga tushgan:

• Turkmaniston (2026 yil 1-yanvardan boshlab);

• Qirg‘iziston (2026 yil 21-yanvardan boshlab);

• Tojikiston (2026 yil 21-yanvardan boshlab).

Shuningdek, MDH davlatlari orasida Gruziya ham 2026 yilning 2-aprelidan boshlab ushbu ro‘yxatga kiritilgan. Ro‘yxatning katta qismini Afrika davlatlari (Angola, Burundi, Chad, Liberiya va boshqalar) hamda ba’zi Osiyo mamlakatlari (Bangladesh, Butan, Kambodja) tashkil etadi.

Kirish va chiqish bo‘yicha qat’iy talablar

Garov puli to‘lagan viza egalari uchun alohida harakatlanish qoidalari belgilangan. Ular AQSHga faqat tijoriy aviakompaniyalar orqali (aeroportlardan) kirishlari va chiqishlari shart. Ularga quruqlik yoki dengiz chegaralari orqali mamlakatga kirish yoki chiqish taqiqlanadi. Ushbu talabning buzilishi ham garov pulining qaytarilmasligiga sabab bo‘lishi mumkin.

To‘lov jarayoni va xavfsizlik

Davlat departamenti viza talabgorlarini faqat konsul ko‘rsatmasidan so‘ng to‘lov qilishga chaqirdi. Barcha to‘lovlar AQSH G‘aznachiligining rasmiy Pay.gov platformasi orqali amalga oshirilishi lozim. Uchinchi tomon veb-saytlari yoki vositachilar xizmatidan foydalanish qat’iyan man etiladi. Agar fuqaro konsul ko‘rsatmasisiz o‘zboshimchalik bilan pul to‘lasa yoki viza rad etilsa, to‘langan mablag‘ qaytarilmasligi mumkin.

Ushbu yangi tizim AQSH hukumatiga noqonuniy migratsiya va viza qoidalarini buzish holatlariga qarshi kurashishda moliyaviy dastak bo‘lib xizmat qilishi kutilmoqda.