Россияда Путин топшириғи билан VPN пуллик бўлиши мумкин — «Forbes»
Нашрнинг ёзишича, Рақамли ривожланиш вазирлиги телекоммуникация операторларидан VPN хизматларидан фойдаланган ҳолда трафик учун тўлов олишни сўраган. Бу Путиннинг буйруғи билан амалга оширилган.
Россия Федерацияси Рақамли ривожланиш вазирлиги мамлакат президенти Владимир Путиннинг топшириғи билан алоқа операторларидан VPN хизматларидан фойдаланилганда трафик учун ҳақ олишни сўради. Бу ҳақда «Forbes» манбаларга таянган ҳолда ёзмоқда.
Нашр маълумотларига кўра, вазирлик раҳбари Мақсут Шадаев ушбу сўровни 28-март куни йирик алоқа операторлари билан ўтказилган ёпиқ йиғилишда билдирган. Мулозим мобил тармоқларда ойига 15 гигабайтдан ортиқ халқаро трафикдан фойдаланишни тарифлашни (пуллик қилишни) таклиф этди. Ушбу тизим 1-майга қадар иш бошлаши керак.
Шу куннинг ўзида онлайн платформалар вакиллари иштирокида ўтган бошқа бир йиғилишда Шадаев улардан VPN орқали кирувчи мижозлар учун ўз хизматларидан фойдаланиш имкониятини чеклашни талаб қилди. «Коммерсант»нинг ёзишича, буни таъминламаган йирик платформалар «оқ рўйхатлар»дан чиқариб юборилиши мумкин.
Шунингдек, Шадаев келажакда Россияда VPN’дан фойдаланганлик учун маъмурий жавобгарлик жорий этилиши мумкинлигини инкор этмади, лекин «бусиз ҳам ишни ҳал қилишга» умид билдирди.
«Forbes» таъкидлашича, барча манбалар ушбу ташаббус президентнинг ёпиқ топшириғидан келиб чиққан деган фикрда якдил.
Россияда «Telegram» блокланиши фонида VPN’га бўлган талаб кескин ошди. Ҳозирда блоклашларни айланиб ўтиш учун мўлжалланган турли иловалар Россия «App Store»нинг Топ-10 талигидан саккизта, «Google Play Market»да эса олтита ўринни эгаллаб турибди.
Теглар:
SEO title:
Meta description:
