«OpenAI» 122 млрд доллар инвестиция жалб қилди ва 852 млрд долларга баҳоланди

«OpenAI» компанияси рекорд даражадаги 122 миллиард доллар миқдорида сармоя тўплашга муваффақ бўлди. Бу феврал ойида эълон қилинган 110 млрдлик прогноздан ҳам ошиб кетди. Молиялаштиришнинг асосини технологик гигантлар ташкил этди: «Amazon» 50 млрд долларгача, «Nvidia» ва «SoftBank» эса 30 млрд доллардан инвестиция киритишга келишиб олдилар. Аввалроқ 13 млрд доллар тиккан «Microsoft» ҳам ушбу раундга қўшилди.

Эътиборли жиҳати, «OpenAI» илк бор банк каналлари орқали ўз акцияларини чакана (индивидуал) инвесторларга ҳам очиб, улардан 3 млрд доллар йиғди. CNBC нашрининг ёзишича, компания ҳозирда ойига 2 млрд доллар даромад кўрмоқда (ўтган йили 13,1 млрд доллар), бироқ агрессив кенгайиш ва инфратузилма харажатлари туфайли стартап ҳамон зарар билан ишламоқда.

Харажатларни қисқартириш

Биржага чиқиш (IPO) олдидан Сэм Алтман инвесторлар босими остида қолди. Буюк ваъдалар бериш билан бирга, компания реал харажатларни жиловлаши керак. Шу сабабли, «OpenAI» қисқа видеолар яратувчи машҳур «Sora» иловасини ишлаб чиқишни тўхтатишга қарор қилди.

Расмий маълумотларга кўра, бу қадам нафақат пул тежаш, балки фойдаланувчилар қизиқишининг пасайиши ва «Disney» корпорацияси билан лицензия келишувининг барбод бўлиши билан боғлиқ. Компания молиявий директори Сара Фрайер 2026 йилда «OpenAI» бор эътиборини кўнгилочар сервисларга эмас, балки бизнес учун «амалий воситалар» сотишга қаратишини очиқлади.

Инвестициялар ортидаги хавфлар

«OpenAI» жалб қилган миллиардлар «қаттиқ» шартлар билан суғурталанган. Масалан, «Amazon» ваъда қилган 50 млрд долларнинг 35 млрди шартли ҳисобланади — стартап бу пулни фақат муваффақиятли IPO ўтказса ёки «умумий сунъий интеллект» (AGI) яратиш каби технологик ютуққа эришсагина олади.

Яна бир муҳим жиҳат — технологик сектордаги «айланма мажбурият»дир. Стартап «Amazon», «Microsoft» ва «Nvidia» кабилардан олган миллиардларини кейинчалик уларга булутли серверлар ижараси ва чиплар сотиб олиш учун қайтариб беради.

Нега бу муҳим?

852 млрд долларлик баҳо «OpenAI»ни молиявий аномалияга айлантиради: компаниянинг қиймати баъзи давлатлар иқтисодиётидан катта, лекин у ҳали ҳам ўз харажатларини қоплашга қодир эмас. «ChatGPT»нинг ҳафталик аудиторияси 900 млндан ошгани ва 50 млн пуллик обуначиси борлиги компаниянинг келажагига бўлган умидни сақлаб турибди.